LKK Vs DD: புள்ளி பட்டியலில் முதலில் இருந்த திண்டுக்கல் அணியை அபராமாக வீழ்த்திய கோவை கிங்ஸ்!

7 வது சீசன் டி.என்.பி.எல் போட்டியின் 3வது கட்ட லீக் ஆட்டங்கள் சேலம் அருகே உள்ள வாழப்பாடியில் நடந்து வருகிறது. நேற்று மதியம் 3:15 மணி அளவில் நடந்த போட்டியில் திண்டுக்கல் அணியை எதிர்கொண்டது கோவை கிங்ஸ். டாஸ் வென்ற திண்டுக்கல் அணி முதலில் பந்துவீச்சை தேர்வு செய்தது.

தொடக்க ஆட்டகாரர்களான எஸ்.சுஜய் ,சுரேஷ் குமார் ஆகியோர் சிறப்பான ஆட்டத்தை வெளிப்படுத்தினர். இவர்களுடைய பார்ட்னர்ஷிப் 49 ரன்களில் முறிந்தது. பின்னர் களம் இறங்கிய சாய் சுதர்சன் அதிரடிகாக ஆட ஆரம்பித்தார்.

சாய் சுதர்சன் அதிரடியான ஆட்டத்தால் ரன்கள் மளமளவென குவிய ஆரம்பித்தது. சிறப்பாக ஆடிய சாய் சுதர்சன் 4 சிக்சர்கள் 8 பவுண்டரிகளுடன் 83 ரன்கள் எடுத்து ஆட்டமிழக்காமல் இருந்தார். 20 ஓவர் முடிவில் 5 விக்கெட் இழப்பிற்கு 206 ரன்கள் குவித்தது கோவை கிங்ஸ்.

இரண்டாவது இன்னிங்சை தொடங்கிய திண்டுக்கல் அணியின் தொடக்க ஆட்டக்காரர்கள் ஆட்டம் ஆரம்பிக்கும் போதே ஆட்டம் கண்டனர்.சிவம் சிங்கை தவிர மற்ற வீரர்களான ராகுல், பாபா இந்திரஜித், ஆதித்யா கணேஷ் ஆகியோர் சொற்ப ரன்களில் ஆட்டமிழந்தனர்.

சிவம் சிங் மட்டும் ஒருபுறம் நிதானமாக ஆடி ரன்களை அணிக்காக சேர்த்துக் கொண்டிருந்தார். இவருக்கு உறுதுணையாக யாரும் களத்தில் செயல்படவில்லை.

பின்னர் வந்த சரத் குமார் சற்று ரன்களை சேர்க்க 19.1 ஓவரில் அனைத்து விக்கெட்டுகளையும் இழந்து திண்டுக்கல் டிராகன்ஸ் அணி தோல்வியை தழுவியது. 83 ரன்கள் அடித்து அசத்திய சாய் சுதர்சனுக்கு ஆட்ட நாயகன் விருது வழங்கப்பட்டது.