கல்லூரியில் படிக்கும் போலீசாரின் மகளை கடத்திச் சென்ற காவலர்-காவல் நிலையத்தில் அளிக்கப்பட்ட புகாரால பரபரப்பு.
கடலூர் அனைத்து மகளிர் காவல் நிலையத்தில் பெண் காவலர் ஒருவர் பணிபரிந்து வருகிறார்.
இவர் தனது குடும்பத்தினருடன் புதுநகர் போலீஸ் நிலையத்தின் பின்புறம் உள்ள காவலர் குடியிருப்பில் வசித்து வரும் நிலையில் இவரது மகளான 19 வயதுடைய மாணவி, கடலூரில் உள்ள தனியார் கல்லூரியில் பி.காம். 2-ம் ஆண்டு படித்து வருகிறார்.
நேற்று முன்தினம் மாலை, வீட்டில் இருந்த மாணவியை திடீரென காணவில்லை. இதனால் அதிர்ச்சி அடைந்த பெற்றோர், பல்வேறு இடங்களில் தேடி பார்த்தனர். இருப்பினும் மாணவி கிடைக்கவில்லை.
இதுபற்றி அக்கம் பக்கத்தில் விசாரித்ததில் மாணவியை, அண்ணாமலை நகர் போலீஸ் நிலையத்தில் போலீஸ்காரராக பணிபுரியும் கடலூர் வில்வநகரை சேர்ந்த வேல்முருகன் (32) என்பவர் கடத்தி சென்றது தெரியவந்தது.
இதுகுறித்து பெண் போலீஸ், கடலூர் புதுநகர் போலீஸ் நிலையத்தில் புகார் கொடுத்தார். அந்த புகாரில், தனது மகளை காவலர் வேல்முருகன் கடத்தி சென்று விட்டதாகவும், அவருக்கு உடந்தையாக அவரது தங்கை உள்ளிட்ட 3 பேர் இருந்ததாகவும் தெரிவித்தார்.
அதன் அடிப்படையில் போலீசார் வழக்குப்பதிவு செய்து விசாரணை நடத்தி வருகின்றனர். பெண் போலீசின் மகளை, போலீஸ்காரர் கடத்தி சென்ற சம்பவம் கடலூரில் பரபரப்பை ஏற்படுத்தி உள்ளது.
ABP நாடு செய்திகளை சமூக வலைத்தள பக்கங்களிலும் பின் தொடரலாம்