புதுச்சேரி சுற்றுலா பயணிகளை மகிழ்விக்க பாண்டி மெரினா கடற்கரையில் பாராசூட் சாகச பயணம் தொடங்கப்பட்டுள்ளது. 10 நிமிட பயணத்துக்கு ரூ.4,500 கட்டணம் ஆகும். புதுச்சேரி பாண்டி மெரினா கடற்கரையில் சுற்றுலா பயணிகளை மகிழ்விக்கும் விதமாக பல்வேறு வகையான உணவு குடில்கள், சுற்றுலா குடில்கள், கரும்பு குடில்கள் மற்றும் குழந்தைகளுக்கான விளையாட்டு சாதனங்கள் அமைக்கப்பட்டுள்ளன. இதற்கு சுற்றுலா பயணிகளிடையே நல்ல வரவேற்பு கிடைத்துள்ளது. மேலும் 'பேரா மோட்டரிங்' மூலம் இயங்கும் பாராசூட் சாகச பயணம் இன்று புதிதாக தொடங்கப்பட்டது. இதற்காக நன்கு பயிற்சி பெற்ற பைலட் மூலம் இயக்கப்பட்டு வருகிறது. தினமும் காலை முதல் மாலை வரை இந்த சாகச பயணம் நடைபெறுகிறது.
இதில் பைலட்டுடன், ஒருவர் அமர்ந்து பயணம் செய்ய முடியும். பாண்டி மெரினா பீச்சில் தொடங்கி இந்த பாராசூட் மூலம் வானத்தில் சுமார் 10 நிமிடம் பறந்து புதுச்சேரியின் கடற்கரை அழகை ரசிக்க முடியும். பாண்டி மெரினாவில் தொடங்கி புதுச்சேரி கடற்கரை, பழைய துறைமுகம் வழியாக சென்று பாண்டி மெரினாவிற்கு மீண்டும் வந்து சேரும். இதற்கு முன்பதிவு செய்ய பாண்டி மெரினா பீச்சில் சிறப்பு கவுண்ட்டர்கள் செயல்பட்டு வருகிறது. மேலும் ஆன்லைன் மூலமாகவும் முன்பதிவு செய்ய முடியும். 10 நிமிட பயணத்துக்கு கட்டணமாக ரூ.4,500 வசூலிக்கப்படுகிறது. தொடக்க விழாவை முன்னிட்டு பல்வேறு சிறப்பு சலுகைகள் வழங்கப்பட்டுள்ளது. அதே வேளையில் சுற்றுலா பயணிகள் தரப்பில், இந்த கட்டணம் மிகவும் அதிகம் என்றும், பாதியாக குறைத்தால் பயணிகள் ஆர்வமாக பயணிக்க விரும்புவதாகவும் தெரிவித்தனர்.
என்ன செய்ய வேண்டும்?
ABP நாடு செய்திகளை சமூக வலைத்தள பக்கங்களிலும் பின் தொடரலாம்