விழுப்புரம் கீழ்பெரும்பாக்கத்தில் அரசு மேல்நிலைப்பள்ளி உள்ளது. இப்பள்ளியில் 500-க்கும் மேற்பட்ட மாணவ- மாணவிகள் படித்து வருகின்றனர். இப்பள்ளியில் 9-ம் வகுப்பு படிக்கும் மாணவர்கள் ஒருவருக்கொருவர் நேற்று முன்தினம் விளையாட்டாக பேசிக் கொண்டிருந்த போது வாய்த்தகராறு ஏற்பட்டது. இதில் ஒரு மாணவர் தாக்கப்பட்டார். உடனே அம்மாணவர், அதே பள்ளியில் பிளஸ்-2 படிக்கும் தனது அண்ணனிடம் கூற, அவர் தனது நண்பர்கள் சிலருடன் 9-ம் வகுப்பு மாணவர்களிடம் சென்று அவர்களை தட்டிக்கேட்டு தாக்கினார்.
சிறிது நேரத்தில் இருதரப்பு மாணவர்களும் ஒருவரையொருவர் திட்டிக்கொண்டு தகராறில் ஈடுபட்டனர். உருட்டுக்கட்டையை கொண்டு தாக்குதல் நடத்தினர். பின்னர் மாலையில் பள்ளி முடிந்ததும் அம்மாணவர்களில் ஒரு தரப்பை சேர்ந்தவர்களின் உறவினர்களான ஜி.ஆர்.பி. தெரு, சேவியர் தெரு, தாமரைக்குளம் பகுதிகளை சேர்ந்த வாலிபர்கள் உருட்டுக்கட்டை, இரும்புக்குழாய்களுடன் அப்பள்ளியின் அருகில் சென்று அவ்வழியாக வந்த மற்ற மாணவர்கள் மட்டுமின்றி சாலையில் சென்றவர்களையும் தாக்கியதாக கூறப்படுகிறது. இதையடுத்து இச்சம்பவம் தொடர்பாக நேற்று காலை விழுப்புரம் நகர காவல் ஆய்வாளர் காமராஜ், சப்-இன்ஸ்பெக்டர் சுரேஷ்குமார், சிறப்பு சப்-இன்ஸ்பெக்டர் தட்சிணாமூர்த்தி ஆகியோர் அப்பள்ளிக்கு நேரில் சென்று விசாரணை நடத்தினர்.
மேலும் இரு தரப்பு மாணவர்களையும், அவர்களது பெற்றோர்களையும் பள்ளிக்கு வரவழைத்து அவர்களுக்கு ஆசிரியர்கள் மற்றும் போலீசார் தகுந்த அறிவுரைகளை வழங்கினர். அதோடு மாணவர்களிடம் நல்லொழுக்கத்தை கடைபிடிக்குமாறு ஆசிரியர்கள் பல்வேறு அறிவுரைகளை வழங்கினர். இந்த சம்பவத்தால் அப்பகுதியில் பரபரப்பு நிலவியது. மேலும் இதே போல் திண்டிவனம் அருகே உள்ள வேப்பேரி அரசு பள்ளி மாணவர்கள் இருதரப்பாக பிரிந்து மோதலில் ஈடுபட்டனர். இதனை அறிந்த பிரம்மதேசம் காவல் துறையினர் மாணவர்களின் வாகனகளை பறிமுதல் செய்து விசாரணை நடத்தி வருகின்றனர்.
என்ன செய்ய வேண்டும்?
ABP நாடு செய்திகளை சமூக வலைத்தள பக்கங்களிலும் பின் தொடரலாம்