திருச்சி மாநகராட்சியில் உள்ள 65 வார்டுகளிலும் அதிமுக தனித்து போட்டியிடுவதாக தலைமைகழகம் அறிவித்தது. இந்நிலையில் அதிமுக கூட்டணியில் இருந்த தமிழ்மாநில காங்கிரஸ் கட்சிக்கு இடபங்கீடு பேச்சுவார்த்தை நடத்தி சுமுகமாக முடிவு எட்டபட்டது. இதனை தொடர்ந்து திருச்சி மாநகராட்சியில் 1 வார்டு ஓதுக்கீடு செய்யபட்டது. இதனை தொடர்ந்து திருச்சி மாநகராட்சி 51 வது வார்டு பெண்களுக்காக ஒதுக்கீடு செய்யபட்டுள்ளது. இதில் வருகின்ற தேர்தலில் அதிமுக சார்பாக வட்ட செயலாளர் பழனிச்சாமியின் மகள் திவ்யா என்ற இளம் பெண்ணுக்கு போட்டியிட வாய்ப்புகள் வழங்கபட்டது.
இந்நிலையில் திவ்யா வேட்புமனு தாக்கல் செய்வதற்குள் 51 வது வார்டை தமிழ் மாநில காங்கிரஸ் கட்சிக்கு மாற்றி கொடுக்கபட்டது. இதனால் திவ்யா அந்த வார்டில் போட்டியிட முடியாத சூழ்நிலை உருவாகியது. இதனால் அதிர்ச்சி அடைந்த அதிமுக வட்ட செயலாளர் பழனிச்சாமி தன் மகள் தேர்தலில் நிற்க ரூ. 5 லட்சம் ரூபாய் அ.தி.மு.க முன்னால் அமைச்சர் வெல்லமண்டி நடராஜன் கேட்டார், ஆனால் பணம் கொடுக்க தாமதமானதால் தன் மகளுக்கு அ.தி.மு.க தலைமை ஒதுக்கிய வார்டை கூட்டணி கட்சிக்கு ஒதுக்கினார் வெல்லமண்டி நடராஜன் என குற்றச்சாட்டு சாட்டியுள்ளார்.
மேலும் வேட்பு மனு தாக்கலுக்கான கடைசி நாளில் திருச்சி மாநகராட்சியில் உள்ள 51 வது வார்டில் அ.தி.மு.க வேட்பாளர் திவ்யாவிற்கு பதிலாக இரட்டை இலை சின்னத்தில் தமிழ் மாநில காங்கிரஸ் கட்சியை சேர்ந்த செங்கேணி என்பவர் போட்டியிடுவார் என திடீரென அறிவித்தது. இதில் மனமுடைந்து போன திவ்யா த.மா.க வேட்பாளருக்கு எதிராக 51 வது வார்டில் சுயேட்சையாக வேட்பு மனு தாக்கல் செய்துள்ளார். இந்நிலையில் திவ்யாவின் தந்தையும் அ.தி.மு.க வின் 51 வது வார்டு வட்ட செயலாளருமான பழனிச்சாமி செய்தியாளர்களை சந்தித்து பேசினார்.
அப்போது அவர் கூறியது.. 1972 ஆம் ஆண்டு அ.தி.மு.க தொடங்கியது முதல் அக்கட்சியில் மட்டுமே இருந்து பணியாற்றி வருகிறேன். தொடர்ந்து பல்வேறு போராட்டங்களில் பங்கெடுத்துள்ளேன். எனது மகள் 51 வது வார்டில் போட்டியிடுவார் என அ.தி.மு.க தலைமை அறிவித்தது. இதற்கு உடனடியாக 5 லட்சம் ரூபாய் பணம் கொண்டு வந்து தர வேண்டும் என முன்னாள் சுற்றுலா துறை அமைச்சரும், அ.தி.மு.க திருச்சி மாநகர் மாவட்ட செயலாளருமான வெல்லமண்டி நடராஜன் வற்புறுத்தினார். அவர் கேட்ட நேரத்தில் அந்த பணம் என்னிடம் இல்லை. உடனடியாக வீட்டிலிருந்த நகைகளை அடகு வைத்து, உறவினர்களிடம் கடன் வாங்கி கொண்டு மறுநாள் காலை வெல்லமண்டி நடராஜனை சந்திக்க சென்றேன். காலதாமதமாக பணம் கொண்டு வந்ததை காரணம் காட்டி எனது மகளுக்கு ஒதுக்கிய வார்டை தமிழ் மாநில காங்கிரஸ் கட்சிக்கு ஒதுக்கி விட்டதாக அவர் கூறினார்.
தொடர்ந்து இது போல் தான் வெல்லமண்டி நடராஜன் செயல்பட்டு வருகிறார். கட்சியின் உண்மை தொண்டர்களை மதிக்காமல் இருக்கிறார். அவருடைய மகனுக்கு அவர் சீட் வழங்கி உள்ளார். அவர் மாவட்ட செயலாளராக இருக்கும் வரை கட்சி அழிந்து தான் போகும். எனவே வெல்லமண்டி நடராஜன் செயலை குறித்து முன்னாள் முதலமைச்சரும் அ.தி.மு.க இணை ஒருங்கிணைப்பாளருமான எடப்பாடி பழனிச்சாமியிடம் புகார் தெரிவிப்பேன். அவரை மாவட்ட செயலாளர் பதவியிலிருந்து நீக்கும் வரை ஓயமாட்டேன் என கூறினார். பின்னர் தரையில் இருந்த மண்ணை வாரி இறைத்து வெல்லமண்டி நடராஜனை அவர் சாபமிட்டார். மேலும் பணம் கொடுக்க தாமதமானதால் அ.தி.மு.க வில் கவுன்சிலர் சீட்டை மாற்றி வழங்கியது அதிர்ச்சியை ஏற்படுத்தி உள்ளது.