கனிமொழி எம்.பியிடம் குடிநீர் பிரச்சினை குறித்து வாதம் செய்த பாஜக நகர்மன்ற உறுப்பினர் - சீன் போடாத தம்பி என்று கூறிய அமைச்சர் கீதாஜீவனால் பரபரப்பு ஏற்பட்டது.
தூத்துக்குடி மாவட்டம் கோவில்பட்டியில் நடைபெற்ற வருவாய் ஆய்வாளர் அலுவலகம் புதிய கட்டிடம் திறப்புவிழாவில் கலந்து கனிமொழி எம்.பியிடம் நகராட்சி 20வது வார்டு உறுப்பினர் பாஜகவை சேர்ந்த விஜயகுமார் என்பவர் தனது வார்டு குடிநீர் பிரச்சினை குறித்து தொடர்ந்து வாதம் செய்ததால் விழாவில் பெரும் பரபரப்பு ஏற்பட்டது. வாதம் முற்றவே தம்பி சீன் போடாத என்று அமைச்சர் கீதாஜீவன் கூற பெரும் பரபரப்பு ஏற்பட்டது. திமுக நிர்வாகிகளும் பாஜக நகர்மன்ற உறுப்பினருடன் வாக்குவாதத்தில் ஈடுபட முயற்சி செய்யவே அது வரை வேடிக்கை பார்த்த காவல்துறை பின்னர் விஜயகுமாரை அங்கிருந்து அகற்றினர்.
தூத்துக்குடி மாவட்டம் கோவில்பட்டி அருகேயுள்ள கரிசல்குளம், துறையூரில் தலா 6 லட்ச ரூபாய் மதிப்பீட்டில் புதிய பயணிகள் நிழற்குடை தொடக்க விழா மற்றும், கிழவிபட்டி, துறையூரில் மக்கள் குறைகள் கேட்கும் கூட்டம், நலத்திட்ட உதவிகள் வழங்கும் நிகழ்ச்சி நடைபெற்றது. இந்நிகழ்ச்சிகளில் தூத்துக்குடி நாடாளுமன்ற உறுப்பினர் கனிமொழி, தமிழக சமூக நலன் , மகளிர் உரிமைத்துறை அமைச்சர் கீதாஜீவன் ஆகியோர் கலந்து கொண்டு பணிகளை தொடங்கி வைத்தனர். மேலும் மக்களின் குறைகள், கோரிக்கைகள் குறித்து கேட்டறிந்தது மட்டுமின்றி, நலத்திட்ட உதவிகளையும் வழங்கினர். தொடர்ந்து கோவில்பட்டியில் புதியதாக கட்டப்பட்ட வருவாய் ஆய்வாளர் அலுவலகத்தினை கனிமொழி எம்.பி. அமைச்சர் கீதாஜீவன் ஆகியோர் திறந்து வைத்தனர்.
அப்போது கோவில்பட்டி நகராட்சி 20வது வார்டு உறுப்பினர் பாஜகவை சேர்ந்த விஜயகுமார், தனது வார்டு பகுதியில் குடிநீர் பிரச்சினை குறித்து கனிமொழி எம்.பியிடம் கோரிக்கை மனுஅளித்தார். மனுவினை பெற்றுக்கொண்ட கனிமொழி எம்.பி. உரிய நடவடிக்கை எடுக்கப்படும் என்றார் . இருந்த போதிலும் பாஜக நகர்மன்ற உறுப்பினர் விஜயகுமார் தொடர்ந்து தன்னுடைய பிரச்சினை குறித்து பேசி கொண்டு இருந்தார். எனது வார்டு 1500க்கும் மேற்பட்ட வாக்குகள் உங்களுக்கு (கனிமொழி எம்.பி;) விழுந்து இருக்கு நடவடிக்கை எடுக்க வேண்டும் என்று தொடர்ந்து பேசியதால் அப்பகுதியில் சிறிது நேரம் சலசலப்பு ஏற்பட்டது.
இதையெடுத்து திமுகவினர் அவருடன் வாக்குவாதம் செய்ய முற்படவே அதுவரை வேடிக்கை பார்த்து கொண்டு இருந்த காவல்துறை விஜயகுமாரை அங்கிருந்து அப்புறப்படுத்தும் முயற்சியில் ஈடுபட்டனர். இருந்த போதிலும் விஜயகுமார் தொடர்ந்து பேசிக்கொண்டு இருந்தால் தம்பி சீன் போடாதே என்று அமைச்சர் கீதாஜீவன் கூறியதால் பெரும் பரபரப்பு ஏற்பட்டது.
இதற்கு இடையில் பாஜக உறுப்பினர் விஜயகுமார் , கனிமொழி எம்.பியிடம் தண்ணீர் பிரச்சினை குறித்து பேசி கொண்டு இருந்ததை பதிவு செய்த ஊடகங்களை நான் எடுக்க சொன்னேனா என கேட்டதும் குறிப்பிடத்தக்கது.