தஞ்சை ஆயுதப்படை மைதானத்தில் கொரோனா விதிமுறைகளை பின்பற்றி எளிய முறையில் நடந்த குடியரசு தின விழாவில் மாவட்ட ஆட்சியர் தினேஷ் பொன்ராஜ் ஆலிவர் தேசிய கொடியேற்றினார். நாட்டின் 73 ஆவது குடியரசு தினவிழா நேற்று நாடு முழுவதும் கொண்டாடப்பட்டது. தமிழகத்தில் கொரோனா பரவல் காரணமாக குடியரசு தினவிழாவில் மாணவர்கள் நடத்தும் கலை நிகழ்ச்சிகள் ரத்து செய்து தமிழக அரசு அறிவித்தது.
இதனால் பள்ளி கல்லூரி மாணவ, மாணவிகளின் கலை நிகழ்ச்சிகள் நடைபெறவில்லை. விழாவினை முன்னிட்டு தஞ்சாவூர் ஆயுதப்படை மைதானத்தில் மாவட்ட கலெக்டர் தினேஷ் பொன்ராஜ் ஆலிவர் தேசிய கொடியேற்றினார். பின்னர் போலீசாரின் அணிவகுப்பு மரியாதையை ஏற்றுக் கொண்டார். இதையடுத்து சுதந்திர போராட்ட தியாகிகளுக்கு கைத்தறி ஆடை அணிவித்து கவுரவித்தார். தொடர்ந்து சிறப்பாக பணியாற்றிய காவல்துறையை சேர்ந்த 54 பேருக்கு முதல்வர் பதக்கம் மற்றும் சான்றிதழ்களை கலெக்டர் தினேஷ் பொன்ராஜ் ஆலிவர் வழங்கினார்.
தொடர்ந்து மாவட்ட நிர்வாகத்தினர், மருத்துவ கல்லூரி மருத்துவமனையை சேர்ந்தவர்கள், பொது சுகாதாரம் மற்றும் நோய் தடுப்பு மருந்து துறை, மாநகராட்சி தஞ்சாவூர், கும்பகோணம், மாவட்ட ஊரக வளர்ச்சி முகமை, பேரூராட்சிகள் உதவி இயக்குனர் அலுவலகத்தை சேர்ந்தவர்கள், முன்னாள் படைவீரர் நல துறையை சேர்ந்தவர்கள், வருவாய் மற்றும் பேரிடர் மேலாண்மை துறை, மாவட்ட வளர்ச்சி பிரிவு, வேளாண்மை மற்றும் உளவுத் துறையை சேர்ந்தவர்கள் என சிறப்பாக பணியாற்றிய அரசு அலுவலர்களுக்கு பாராட்டுச் சான்றிதழ்களை வழங்கினார்.
மேலும், பாபநாசம் தாலுக்கா, அலவந்திபுரம் கிராமத்தை சேர்ந்த மூன்று சிறுவர்கள் கடந்த 13.1.2022 அன்று கங்காதாரபுரம் காவிரி ஆற்றில் குளித்து கொண்டிருந்த போது, நீரில் முழ்கினர். அப்போது சிறுவர்களின் அலறல் சத்தம் கேட்டு அங்கு ஆடு மேய்த்து கொண்டிருந்த அதே பகுதியை சேர்ந்த சந்தானம் என்பவரின் மனைவி சரோஜா (60) மற்றும் குப்புசாமி மகன் கண்ணையன் (65) ஆகியோர் தனது உயிரை மதிக்காமல் 13 வயதுடைய இரண்டு சிறுவர்களை காப்பாற்றினர். இதில் 14 வயதுடைய ஒரு சிறுவன் ஆற்றில் அடித்து செல்லப்பட்டான். முதியவர்களான இருவரும், சிறுவர்களை காப்பாற்றியதற்காக, வீரதீர செயலுக்கான முதல்வர் விருது வழங்கப்பட்டது.பகுதியில் ஆற்றில் அடித்துச் செல்லப்பட்ட இரண்டு சிறுவர்களை காப்பாற்றிய மூதாட்டி சரோஜா மற்றும் முதியவர் கண்ணையன் ஆகியோருக்கு வீரதீர செயல்களுக்கான முதல்வர் விருதை வழங்கி கலெக்டர் பாராட்டினார்.
கும்பகோணம் எம்எல்ஏ அலுவலகத்தில் எம்எல்ஏ சாக்கோட்டை அன்பழகன் தேசிய கொடியேற்றி, இனிப்புகளை வழங்கினார். நிகழ்ச்சியில் எம்எல்ஏக்கள் திருவையாறு துரை சந்திரசேகரன், தஞ்சாவூர் டி.கே.ஜி. நீலமேகம், டிஐஜி கயல்விழி, கூடுதல் கலெக்டர்கள் சுகபுத்ரா, ஸ்ரீகாந்த், தஞ்சை மருத்துவ கல்லூரி முதல்வர் ரவிக்குமார், வருவாய் கோட்டாட்சியர் ரஞ்சித், கலெக்டரின் நேர்முக உதவியாளர் ரங்கராஜன், மாவட்ட ஊராட்சி தலைவர் உஷா புண்ணியமூர்த்தி, துணைத்தலைவர் முத்துச்செல்வன் மற்றும் பலர் கலந்து கொண்டனர்.