அண்ணா பல்கலைக்கழகத்தில் போலி கௌரவ டாக்டர் பட்டம் வழங்கியதற்கும் அண்ணா பல்கலைக்கழகத்திற்கும் எந்த தொடர்பும் இல்லை என பல்கலைக்கழக துணை வேந்தர் வேல்ராஜ் விளக்கமளித்துள்ளார்.
சர்வதேச ஊழல் தடுப்பு மற்றும் மனித உரிமைகள் ஆணையம் சார்பில் கெளரவ டாக்டர் பட்டம் வழங்கும் நிகழ்ச்சி கடந்த பிப்ரவரி 26 ஆம் தேதி அண்ணா பல்கலைக்கழகத்தில் நடைபெற்றது. இந்நிகழ்ச்சியில் இசையமைப்பாளர் தேவா, நடிகர் கோகுல், நடன மாஸ்டர் சாண்டி, ஸ்டாண்ட் அப் காமெடியன் ஈரோடு மகேஷ் உள்ளிட்ட 40க்கும் மேற்பட்டோருக்கு இந்நிகழ்ச்சியில் டாக்டர் பட்டம் ஓய்வுப் பெற்ற நீதிபதி வள்ளிநாயகம் சிறப்பு விருந்தினராக கலந்து கொண்டு வழங்கினார்.
இந்நிகழ்ச்சிக்கு நேரில் வரமுடியாத நடிகர் வடிவேலுக்கு நேரில் சென்று கௌரவ டாக்டர் பட்டத்தை நிகழ்ச்சி ஏற்பட்டாளர்கள் வழங்கினார்கள். அதன் வீடியோ இணையத்தில் வைரலானது. இதனிடையே இந்த விழா குறித்த சர்ச்சை வெடித்தது. இந்த டாக்டர் பட்டம் போலியானது என தகவல் வெளியானது. சர்வதேச ஊழல் தடுப்பு மற்றும் மனித உரிமைகள் ஆணையம் சார்பில் நடத்தப்பட்டதாக சொல்லப்பட்ட நிகழ்ச்சியின் அழைப்பிதழில் அண்ணா பல்கலைக்கழகம் மற்றும் ஓய்வுப்பெற்ற நீதிபதி வள்ளிநாயகத்தின் பெயர் பெரிய எழுத்துக்களில் அச்சிடப்பட்டிருந்தது.
இதனிடையே இந்த நிகழ்ச்சிக்கு கடந்த நவம்பர் மாதமே அனுமதி கோரப்பட்ட நிலையில், முதலில் அனுமதி மறுக்கப்பட்டது. ஆனால் ஓய்வுப்பெற்ற நீதிபதி வள்ளிநாயகம் பரிந்துரையின் பேரில் அனுமதி வழங்கப்பட்டதாக அண்ணா பல்கலைக்கழகம் சார்பில் தெரிவிக்கப்பட்டுள்ளதாக தகவல் வெளியாகியுள்ளது. மேலும் இந்த நிகழ்ச்சியில் கொடுக்கப்பட்டது அண்ணா பல்கலைக்கழகத்தின் டாக்டர் பட்டம் இல்லை என்றும், இந்த பட்டம் வழங்கியவர்கள் மீது விரைவில் சட்ட நடவடிக்கை எடுக்கப்படும் என சொல்லப்பட்டதாக தகவல்கள் தெரிவிக்கின்றன.
மேலும் அழைப்பிதழில் இந்திய அரசு முத்திரை இருந்ததால் அண்ணா பல்கலைக்கழகம் சார்பில் தான் கௌரவ டாக்டர் பட்டம் வழங்கப்பட்டுள்ளது என விருது பெற்றவர்கள் தரப்பில் தெரிவிக்கப்பட்டது.
இந்நிலையில் இது தொடர்பாக அண்ணா பல்கலைக்கழக துணை வேந்தர் வேல்ராஜ் விளக்கமளித்துள்ளார். இந்த நிகழ்ச்சி பல்கலைக்கழக வளாகத்தில் நடந்ததற்கு வருந்துகிறோம் என்றும், அந்த தனியார் நிறுவனத்திற்கும் அண்ணா பல்கலைக்கழகத்திற்கும் எந்த தொடர்பும் இல்லை எனவும் கூறியுள்ளார்.