இந்தியா முழுவதும் உள்ள அரசியல் கட்சிகள் ஒவ்வொரு ஆண்டும் தாங்கள் செலவழித்த கணக்கு தணிக்கை அறிக்கையை தேர்தல் கமிஷனிடம் சமர்பிக்க வேண்டும். அந்த அறிக்கையில், அரசியல் கட்சிகள் அந்த ஆண்டு முழுவதும் தாங்கள் பெற்ற நன்கொடை, செலவிட்ட தொகை மற்றும் தற்போது உள்ள இருப்பு தொகை போன்றவை இடம்பெற்று இருக்கும்.
அரசியல் கட்சிகள் செலவுகள்:
இதையடுத்து, அரசியல் கட்சிகள் சமர்ப்பிக்கும் வரவு மற்றும் செலவு தணிக்கை அறிக்கையை தேர்தல் கமிஷன் தனது அதிகாரப்பூர்வ இணையதளத்தில் பொது மக்கள் அறிந்து கொள்வதற்காக வெளியிடப்படும். இந்த நிலையில், 2021 - 22ம் ஆண்டுக்கான வரவு செலவு கணக்கு அறிக்கையை அரசியல் கட்சிகள் சமர்ப்பித்தன. அதை தேர்தல் கமிஷன் தனது இணையதளத்தில், அங்கீகாரம் பெற்ற தேசிய கட்சிகள், அங்கீகாரம் பெற்ற மாநில கட்சிகள் என்ற இரு பிரிவுகளில் தனித்தனியாக வெளியிட்டுள்ளது.
அதில், ஒவ்வொரு கட்சியின் ஆண்டு வரவு செலவு அறிக்கையும், அக்கட்சி பெயரில் தனித்தனியே பதிவேற்றம் செய்யப்பட்டுள்ளது. இதில், தேசிய மற்றும் மாநிலம் என்று 17 கட்சிகளின் ஆண்டு தணிக்கை அறிக்கை உள்ளது. அதன்படி, ஆண்டு தணிக்கை அறிக்கை சமர்ப்பித்துள்ள அரசியல் கட்சிகளில், தேசியவாத காங்கிரஸ், ஒய்.எஸ்.ஆர்.காங்கிரஸ், இந்திய கம்யூனிஸ்ட் கட்சி போன்றவை, தேர்தல் விளம்பரத்திற்காக எந்த செலவும் செய்யவில்லை என கூறப்பட்டுள்ளது.
திமுக வெளியிட்ட வரவு செலவு கணக்கு அறிக்கை:
தமிழ்நாட்டில் ஆளுங்கட்சியாக உள்ள தி.மு.க. கடந்த ஆண்டு செலவிட்ட 35.40 கோடி ரூபாய் செலவிடப்பட்டுள்ளது. இந்தத் தொகை தேர்தலுக்காக மட்டும் 31.54 கோடியில், 87 சதவீதம் விளம்பரத்துக்காக மட்டுமே செலவிட்டுள்ளது.
அதில், திமுக சார்பில், அச்சு மற்றும் எலக்ட்ரானிக் விளம்பரத்துக்கு, 10.67 கோடி ரூபாயும், கேபிள் மற்றும் தொலைக்காட்சி விளம்பரங்களுக்கு 19.95 கோடி ரூபாய் செலவிடப்பட்டுள்ளது. இந்த விபரம் 2021-22ம் ஆண்டு தணிக்கை அறிக்கையில் விரிவாக உள்ளதாக தேர்தல் கமிஷன் தெரிவித்துள்ளது.
அதிமுக:
தமிழ்நாட்டின் எதிர்க்கட்சியான அதிமுக 2021-22ம் ஆண்டு, 28.43 கோடி ரூபாய் செலவழித்துள்ளது. இதில், 22.47 கோடி ரூபாயை தேர்தல் செலவாக அதிமுக கணக்கை சமர்பித்துள்ளது. இந்த தொகையில், 22.28 கோடி ரூபாய் விளம்பரத்துக்காகவும், 18.47 லட்சம் ரூபாய் முக்கிய வேட்பாளர்கள் போக்குவரத்துக்காகவும் செலவு செய்துள்ளதாக தெரிவிக்கப்பட்டுள்ளது.