5 மாவட்டங்கள்:
தமிழ்நாட்டில் உள்ள ராமநாதபுரம், தென்காசி, திருநெல்வேளி, தூத்துக்குடி மற்றும் கன்னியகுமரி ஆகிய 5 மாவட்டங்களில் தற்போதைய இரவு முதல் நாளை அதிகாலை 1 மணிவரையில் மழைக்கு வாய்ப்பு உள்ளதாக வானிலை மையம் தெரிவித்துள்ளது. ஆகையால் , இன்று இரவு கொண்டாட்டங்களில் ஈடுபடும் மக்கள், மேலே குறிப்பிடப்பட்டுள்ள மாவட்டங்களைச் சேர்ந்த மக்கள், சற்று முன்னெச்சரிக்கையாக குடை உள்ளிட்டவைகளுடன் இருப்பது நல்லது.
2024 ஆண்டில் எங்கு அதிகமழை?:
2024 ஆண்டில் மழையளவானது, ஜனவரி முதல் டிசம்பர் வரை 117.9 செ.மீ மழை பெய்துள்ளதாக வானிலை மையம் தெரிவித்துள்ளது. இதில், அதிகபட்சமாக நெல்லை மாவட்டத்தில், இயல்பைவிட 100 சதவிகிதம் அதிகமாக மழை பெய்துள்ளதாக வானிலை மையம் தெரிவித்துள்ளது.
மேலும், 27 மாவட்டங்களில் இயல்பைவிட அதிகமாகவும், 12 மாவட்டங்களில் இயல்பை ஒட்டியும் மழை பெய்துள்ளதாக வானிலை மையம் தரப்பில் தெரிவிக்கப்பட்டுள்ளது. 2024 ஆண்டில் எந்த மாவட்டத்திலும் இயல்பைவிட குறைவாக மழை பெய்யவில்லை எனவும் வானிலை மையம் சார்பில் தெரிவித்துள்ளது.
வடகிழக்கு பருவமழை:
வடகிழக்கு பருவமழையானது, அக்டோபர் மாதம் முதல் டிசம்பர் வரையிலான கால அளவில் பெய்யும். இந்த ஆண்டில் அக்டோபர் முதல் டிசம்பர் வரையிலான காலத்தில் 58.99 செ.மீ மழை பெய்துள்ளது. வடகிழக்கு பருவ மழையானது இந்த கால அளவில் இயல்பைவிட 33 சதவிகிதம் அதிகமாகும். கடந்த ஆண்டு வடகிழக்கு பருவமழையானது 4 சதவிகிதம் அதிகமாக இருந்தது குறிப்பிடத்தக்கது.
மாதங்களாக பார்க்கையில், அக்டோபர் மாதத்தில் இயல்பைவிட 25 சதவிகிதம் அதிகம் எனவும் நவம்பர் மாதத்தில் 23 சதவிகிதம் குறைவு எனவும் மற்றும் டிசம்பர் மாதத்தில் இயல்பைவிட 164 சதவிகிதம் அதிகமாக மழை பெய்து உள்ளதாகவும் வானிலை மையம் தெரிவித்துள்ளது.
மாவட்டங்களாக பார்க்கையில், இந்த ஆண்டு வடகிழக்கு பருவமழையை பொறுத்தவரை தமிழ்நாட்டின் 6 மாவட்டங்களான நெல்லை, சேலம், திருப்பத்தூர், தர்மபுரி, கிருஷ்ணகிரி, விழுப்புரம் ஆகிய மாவட்டங்களில் இயல்பை விட அதிகமாக மழைபெய்துள்ளதாக தென் மண்டல வானிலை மைய இயக்குநர் பாலச்சந்திரன் தெரிவித்துள்ளார்.
தென்மேற்கு பருவமழை
தென்மேற்கு பருவமழையானது இயல்பாக ஜூன் மாதம் முதல் செப்டம்பர் வரையிலான கால அளவில் மழை பெய்யும். தென்மேற்கு பருவமழை காலத்தில் நெல்லை மாவட்டத்தில் இயல்பை விட மிக அதிகமாக மழை இருந்தது. 16 மாவட்டங்களில் இயல்பைவிட அதிகமாகவும் 17 மாவட்டங்களில் இயல்பை ஒட்டியும் 6 மாவட்டங்களில் இயல்பை விட குறைவாகவும் இருந்ததாக வானிலை மையம் தெரிவித்துள்ளது.