கரூரில் அதிமுக சார்பில் மொழிப்போர் தியாகிகளுக்கான வீர வணக்க நாள் பொதுக்கூட்டம் நடத்த காவல்துறையினரிடம் முறையாக அனுமதி பெற்று 80 அடி சாலையில் கரூர் மாவட்ட அதிமுக சார்பில் மேடை அமைக்கும் பணிகள் முடிவடைந்து விட்டது.
இந்நிலையில் இங்கு பொதுக் கூட்டம் நடத்தக் கூடாது என போலீசார் தடுப்பதாக கூறி முன்னாள் அமைச்சர் எம்.ஆர்.விஜயபாஸ்கர் தனது வழக்கறிஞர்கள் மற்றும் ஆதரவாளர்களுடன் மாவட்ட காவல் கண்காணிப்பாளரை சந்திக்க வருகை தந்தார். மாவட்ட காவல் கண்காணிப்பாளரை சந்தித்து விட்டு வெளியில் வந்த முன்னாள் அமைச்சர் எம்.ஆர்.விஜயபாஸ்கர் செய்தியாளர்களை சந்தித்தார்.
அப்போது பேசிய அவர், "கரூர் மாவட்ட அதிமுக சார்பில் நடைபெறும் மொழிப்போர் தியாகிகள் நாள் பொதுக்கூட்டத்திற்கு முதலில் லைஹவுஸ் கார்னர் பகுதியில் அனுமதி கேட்கப்பட்டது. திமுக சார்பில் இன்று கரூர் மாநகர காவல் நிலையம் அருகில் பொதுக் கூட்டம் நடக்க இருப்பதால் அந்த அனுமதி மறுக்கப்பட்ட நிலையில், 80 அடி சாலையில் பொது கூட்டம் நடத்த அனுமதி கேட்கப்பட்டு அனுமதி அளிக்கப்பட்ட நிலையில், அங்கு மேடை அமைக்கும் பணிகள் முடிவடைந்து விட்டது.
பேச்சாளர்கள் வருகை தந்து விட்டனர். மாலை 6 மணிக்கு பொதுக் கூட்டம் நடைபெற உள்ள நிலையில், போலீசார் தற்போது பொதுக் கூட்டம் நடத்த அனுமதி மறுக்கப்படுகிறது. காவல்துறை பாரபட்சமாக நடந்து கொள்கிறது. அதிமுக சார்பில் இன்று நடத்துவதாக அறிவிக்கப்பட்ட பொதுக்கூட்டத்திற்கு நாளை அனுமதி வழங்க வேண்டி மாவட்ட எஸ்.பி அலுவலகத்தில் மனுவினை அளித்து இருக்கிறோம். இதற்கெல்லாம் முடிவு வெகு விரைவில் வரும்” என்றார்.