முன்னாள் முதலமைச்சரும் தற்போதைய சட்டமன்ற எதிர்கட்சித் தலைவருமான எடப்பாடி பழனிசாமி, சேலத்தில் நடைபெற்ற மாற்றுக்கட்சியினர் அதிமுகவில் இணையும் நிகழ்ச்சியில் பேசும் போது, அதிமுக அறிமுகப்படுத்திய மாணவர்களுக்கான மடிக்கணினித் திட்டத்தினை திமுக அரசு கைவிட்டுவிட்டதாக குறிப்பிட்டு பேசினார்.
அதன் பின்னர் செய்தியாளர்களைச் சந்தித்த எடப்பாடி பழனிசாமி பேசியதாவது, “ அமைச்சர் செந்தில் பாலாஜி விவகாரத்தில் முதலமைச்சரின் செயல்பாடு சிரிப்பைத்தான் வரவைக்கிறது. ஊழல் குற்றச்சாட்டில் கைது செய்யப்பட்டுள்ள ஒரு அமைச்சரை அமைச்சரவையில் இருந்து விடுவிக்காமல், அமைச்சராகவே தொடரவைப்பது அரசியல் நாகரீகமல்ல. ஊழல் குற்றம் செய்தவர் எந்த கட்சியாக இருந்தாலும் அவரை அமைச்சர் பொறுப்பில் இருந்து விடுவிப்பது தான் அரசியல் நாகரீகம். கடந்த கால வரலாற்றை பாருங்கள், திமுக ஆட்சியில் அதாவது கலைஞர் முதலமைச்சராக இருந்த காலத்தில், அருணா ஊழல் வழக்கில் சம்பந்தப்பட்ட போது, அமைச்சரவையில் இருந்து விடுவிக்கப்பட்டார். என்.கே.கே.பி ராஜா நிலம் அபகரிப்பு வழக்கில் குற்றம்சாட்டப்பட்ட வழக்கில், சம்பந்தப்பட்டபோது அவரையும் கலைஞர் அமைச்சரவையில் இருந்து விடுவித்தார். அதேபோல், அதிமுக ஆட்சி காலத்தில் ஜெயலலிதா முதலமைச்சராக இருந்த போது அக்ரி கிருஷ்ணன் மீது ஊழல் குற்றச்சாட்டு வழக்கு வந்த போது அவர் அமைச்சரவையில் இருந்து விடுவிக்கப்பட்டார். இவையெல்லாம் தமிழகத்தின் கடந்த கால வரலாறு. மேலும், தேர்தல் அடிப்படையில் கூட்டணி என்பது தேர்தலின் போது தான் முழு வடிவம் பெறும், அதுவரை அவரவர் தங்களது கருத்துக்களை கூறிக்கொண்டு தான் வருவார்கள். அதிமுக கொள்கை அடிப்படையில் தான் கூட்டணியே தவிர, அதிமுக அடிமைக் கட்சி கிடையாது. திமுக தான் அடிமைக் கட்சி” என கூறினார்.
மேலும் அவர், “ இது ஜனநாயக நாடு, நடிகர் விஜய் அவருடைய கருத்தைச் சொல்ல அனைத்து உரிமையும் உண்டு. வரும் பாராளுமன்றத் தேர்தலில் தமிழ்நாட்டில் 39 இடங்களிலும், பாண்டிச்சேரியில் ஒரு இடமும் என முழுவதும் கைப்பற்ற அதிமுகவினர் முழுமையான பணிகளை செய்து வருகின்றனர்” எனவும் அவர் கூறினார்.
நீட் தேர்வு குறித்த கேள்விக்கு, நீட் தேர்வு கொண்டுவரப்பட்ட காலம் முதல் அதிமுக எதிர்த்து வருகிறது. நீட் தேர்வினை கொண்டுவந்தது திமுகவும் காங்கிரஸ்ஸும் தான். எனக்கு வந்த தகவலின் படி, தற்போது நீட் தேர்வினால் கிராமப்புற மாணவர்கள் பாதிக்கப்படுவதைத் தடுக்க நான் முதலமைச்சராக இருந்த போது, நானும் அரசுப் பள்ளியில் படித்தவன் என்பதால், என்னால் அரசு பள்ளியின் சூழலை புரிந்து கொண்டதால் தான், நீட் தேர்வுக்கான தற்போதைய தீர்வாக 7.5 சதவீத உள்இட ஒதுக்கீடு கொண்டுவரப்பட்டது. அரசு பள்ளியில் 3 லட்சத்து 80 ஆயிரம் மாணவர்கள் படிக்கிறார்கள் கிட்டத்தட்ட 41 சதவீதம். இதில் 2017 - 18 கல்வியாண்டில், 9 பேர் மட்டும் தான் மருத்துவபடிப்புக்கு சென்றனர். இதனை எண்ணிப்பார்த்து தான் உள் இடஒதுக்கீடு கொண்டுவரப்பட்டது. உள்இட ஒதுக்கீட்டின் மூலம் மருத்துவம் படிக்கும் மாணவர்களுக்கான செலவை அரசே ஏற்கும் என அறிவித்தேன். கூறினார்.