கேரளா மாநிலம் கண்ணூரில் இருந்து கோயம்புத்தூர் சேலம் தருமபுரி வழியாக கர்நாடக மாநிலம் யஷ்வந்த்பூர் வரை தினசரி கண்ணூர் விரைவு ரயில் இயக்கப்பட்டு வருகிறது. இந்த கண்ணூர் விரைவு வண்டி மாலை 6 மணிக்கு கண்ணூரிலிருந்து புறப்பட்டு, அதிகாலை 3.30 மணிக்கு தருமபுரி ரயில் நிலையத்திற்கு வரும்.
இந்நிலையில் இன்று காலை சேலத்தில் இருந்து தருமபுரி நோக்கி வரும் வழியில் 45 கிலோ மீட்டரில் வே.முத்தம்பட்டி வனப்பகுதியில் வனப்பகுதியில் ரயில் தண்டவாளத்தின் அருகில் பாதுகாப்பு சுவரில் கற்கள் சரிந்து கிடந்துள்ளது. இந்தக் கற்களில் ரயில் இன்ஜின் உரசியதில் எஞ்சின் மற்றும் அடுத்த இரண்டு பெட்டிகள் தடம்புரண்டுள்ளது. மேலும் வனப் பகுதி என்பதால், இந்த பகுதிகளில் வரும் ரயில்கள் மெதுவாகவே வருவதால், இன்று பெரும் விபத்து தவிர்க்கப்பட்டுள்ளது. இந்த ரயில் தடம் புரண்டதால், 2348 பயணிகளுக்கு எந்தவித பாதிப்பும் ஏற்படவில்லை. தொடர்ந்து பயணிகள் பாதுகாப்பாக உள்ளனர். தற்போது சுமார் 4 மணி நேரமாக பயணிகளுடன் ரயில் வனப் பகுதியிலேயே நிறுத்தி வைக்கப்பட்டுள்ளது. தொடர்ந்து சேலம் மார்க்கத்தில் வேறு இன்ஜின் வரவழைக்கப்பட்டு, பெட்டிகள் அனுப்பப்பட்டுள்ளது. தற்போது தடம் புரண்ட பெட்டிகளில் இருந்த பயணிகள் பேருந்து மூலம் தருமபுரி ரயில் நிலையத்திற்கு அனுப்பி வைக்கப்பட்டுள்ளனர்.
மேலும் தடம் புரண்ட பெட்டிகளை மீட்கும் பணியில் ரயில்வே துறையினர் ஈடுபட்டு வருகின்றனர். இதனால் தற்போது சேலம் பெங்களூர் மார்க்கத்தில் சுமார் 4 மணி நேரமாக ரயில் போக்குவரத்து நிறுத்தி வைக்கப்பட்டுள்ளது. மேலும் தொடர் மழையால் இந்த கற்கள் சரிந்து விழுந்துள்ளது குறித்து ரயில்வே காவல் துறையினர் தீவிரமாக விசாரணை நடத்தி வருகின்றனர். மேலும் தருமபுரி அருகே தடம்புரண்ட ரயிலின் 7 பெட்டிகள் வேறு இன்ஜின் மூலம் சேலம் அனுப்பப்பட்டுள்ளது. மேலும் இன்ஜின் மற்றும் 4 பெட்டிள் தருமபுரி அனுப்பட்டுள்ளது. மேலும் தடம் புரண்டுள்ள 6 பெட்டிகள் உள்ளிட்ட 9 பெட்டிகள் நிறுத்தி வைக்கப்பட்டுள்ளது. சிறப்பு ரயிலில் திருப்பத்தூர் வழியாக பெங்களூருக்கு அனுப்பப்பட்டுள்ளது. மேலும் பயணிகளின் வசதிக்காக தொப்பூரில் 15 பேருந்துகள் ஏற்பாடு செய்யப்பட்டுள்ளன. விபத்து நடந்த இடத்தில் 5 பேருந்துகள் ஏற்பாடு செய்யப்பட்டுள்ளன.
இதனை மீட்பதற்காக பெங்களூரிலிருந்து ரயில் மீட்பு பணிகள் குழுவினர் வரவுள்ளனர். மேலும் தற்போது வரை சேலம்-பெங்களூர் மார்கத்தில் செல்லும் இன்டர்சிட்டி, பெங்களூர் பேசன்ஜர் உள்ளிட்ட ரயில்கள் நிறுத்தி வைக்கப்பட்டுள்ளது. இதை சரி செய்யும் வரை ரயில் போக்குவரத்து பாதிக்கப்பட்டுள்ளது.மேலும் பயணிகளின் வசதிக்காக தருமபுரி, சேலம் மற்றும் ஓசூர் ஆகிய இடங்களில் உதவி மையம் திறக்கப்பட்டுள்ளது.