மயிலாடுதுறை மாவட்டம், சீர்காழியில் உள்ள ஒரு தனியார் பள்ளிக்கும், திருவெண்காடு கோயிலுக்கும் வெடிகுண்டு மிரட்டல் விடுக்கப்பட்டதால் பெரும் பரபரப்பு ஏற்பட்டது. உடனடியாக, பள்ளி மாணவர்கள் பாதுகாப்பாக வெளியேற்றப்பட்டனர். இதுகுறித்து காவல்துறை தீவிர விசாரணை மேற்கொண்டு வருவதுடன், வெடிகுண்டு நிபுணர்கள் பள்ளி மற்றும் கோயிலில் ஆய்வு செய்து வருகின்றனர்.

வெடிகுண்டு மிரட்டல்

மயிலாடுதுறை மாவட்டம் சீர்காழியில் இயங்கி வரும் பெஸ்ட் மெட்ரிகுலேஷன் தனியார் மேல்நிலைப்பள்ளியில், சீர்காழி மற்றும் அதன் சுற்றுவட்டாரப் பகுதிகளில் இருந்து சுமார் 3,000-க்கும் மேற்பட்ட மாணவர்கள் கல்வி பயின்று வருகின்றனர். இன்று மாலை, பள்ளி அலுவலகத்தின் தொலைபேசி எண்ணுக்கு ஒரு மர்ம நபர் தொடர்புகொண்டு, "பள்ளியில் வெடிகுண்டு வைக்கப்பட்டிருக்கிறது" என்று கூறிவிட்டு இணைப்பைத் துண்டித்துள்ளார்.

திருவெண்காடு புதன் ஸ்தலம் 

அதேபோல, இந்து சமய அறநிலையத் துறைக்குச் சொந்தமானதும், நவக்கிரகங்களில் புதன் பகவானுக்குரிய தலமுமான திருவெண்காடு சுவேதாரண்யேஸ்வரர் கோயிலுக்கும் இதேபோல் ஒரு மர்ம நபர் தொலைபேசியில் மிரட்டல் விடுத்துள்ளார். கோயிலில் வெடிகுண்டு வைக்கப்பட்டிருப்பதாகக் கூறிவிட்டு, உடனடியாக இணைப்பைத் துண்டித்துள்ளார்.

பாதுகாப்பாக வெளியேற்றப்பட்ட மாணவர்கள்

மிரட்டல் குறித்து உடனடியாக பள்ளி நிர்வாகம் சீர்காழி காவல் நிலையத்திற்குத் தகவல் அளித்தது. இதையடுத்து, காவல்துறையினர் உடனடியாகப் பள்ளிக்கு விரைந்து சென்றனர். எந்தவிதப் பதற்றமும் ஏற்படாதவாறு, மாணவர்களைப் பாதுகாப்பாக வெளியேற்றும் பணியில் ஈடுபட்டனர். மாணவர்கள் அனைவரும் பெற்றோர்களுடன் வீட்டிற்கு அனுப்பி வைக்கப்பட்டனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியது.

காவல்துறை விசாரணை

வெடிகுண்டு மிரட்டல் விடுத்த மர்ம நபர் குறித்து காவல்துறையினர் தீவிர விசாரணை மேற்கொண்டு வருகின்றனர். மிரட்டல் அழைப்பு எந்த எண்ணில் இருந்து வந்தது, அந்த எண் யாருடையது என்பது குறித்த விவரங்களைச் சேகரித்து வருகின்றனர். இது ஒரு போலியான மிரட்டலா? அல்லது உண்மையிலேயே வெடிகுண்டு மிரட்டலா? என்பது குறித்துத் தொடர்ந்து விசாரணை நடந்து வருகிறது.

மிரட்டல் குறித்து பேசிய காவல்துறை அதிகாரி ஒருவர், "மிரட்டல் விடுத்த நபர் யார் என்பதை அடையாளம் காண முயற்சித்து வருகிறோம். இது வெறும் வதந்தியாக இருக்கலாம். இருந்தபோதிலும், நாங்கள் எந்தவித ரிஸ்க்கும் எடுக்க விரும்பவில்லை. பாதுகாப்பு நடவடிக்கைகளை மேற்கொண்டு வருகிறோம்" என்று தெரிவித்தார்.

வெடிகுண்டு நிபுணர்கள் ஆய்வு

மிரட்டலைத் தொடர்ந்து, மயிலாடுதுறையில் இருந்து வெடிகுண்டு கண்டறிதல் மற்றும் அகற்றுதல் பிரிவினர் (Bomb Detection and Disposal Squad) பள்ளி மற்றும் கோயிலுக்கு வரவழைக்கப்பட்டுள்ளனர். அவர்கள் வெடிகுண்டு மிரட்டல் விடுக்கப்பட்ட இரு இடங்களிலும் முழுமையான ஆய்வை மேற்கொள்ள உள்ளனர். மோப்ப நாய்களும் வரவழைக்கப்பட்டு, பள்ளி வளாகம் மற்றும் கோயில் வளாகம் முழுவதும் சோதனை நடத்தப்படும்.

பலப்படுத்தப்பட்ட பாதுகாப்பு

மிரட்டலைத் தொடர்ந்து, பள்ளி மற்றும் கோயில் வளாகத்திற்கு வெளியே பாதுகாப்பு பலப்படுத்தப்பட்டுள்ளது. காவல்துறையினர், பொதுமக்கள் மற்றும் வாகனங்களைச் சோதனை செய்த பின்னரே உள்ளே அனுமதிக்கின்றனர். இதுபோன்ற மிரட்டல்கள், பொதுமக்கள் மத்தியில் அச்சத்தையும், பாதுகாப்பின்மை உணர்வையும் ஏற்படுத்துவதாகச் சமூக ஆர்வலர்கள் கவலை தெரிவித்தனர்.

இந்த மிரட்டல் ஒரு சேட்டைத்தனமான செயலாக இருந்தாலும், இதுபோன்ற செயல்கள் சமூகத்தில் தேவையற்ற அச்சத்தையும், பதற்றத்தையும் ஏற்படுத்தும் என்பதைச் சுட்டிக்காட்டுகிறது. காவல்துறை இந்த விவகாரத்தில் விரைந்து செயல்பட்டு, குற்றவாளியைக் கண்டுபிடித்து, இதுபோன்று இனிமேல் நடக்காதவாறு நடவடிக்கை எடுக்க வேண்டும் என்பதே அனைவரின் எதிர்பார்ப்பாக உள்ளது.