மதுரை விஷால் டி மாலில் தீ விபத்து,1000-க்கும் மேற்பட்டோர் உடனடியாக வெளியேற்றம், மதுரையில் பரபரப்பு ஏற்பட்டது.

 

மதுரை தல்லாகுளம் பகுதியில் விஷால் டி மால் எனும் தனியார் ஷாப்பிங் மால் செயல்பட்டு வருகிறது. மதுரையின் பெரிய ஷாப்பிங் மால் என்பதால் இங்கு தினமும் ஆயிரக்கணக்கானோர் வந்து செல்கின்றனர். இந்நிலையில் நேற்று  இரவு சுமார் 9.30 மணி அளவில்  வணிக வளாகத்தின் நான்காவது மாடியில் உள்ள பானிபூரி கடையில்  தீப்பிடித்து வளாகம் முழுவதும் பரவியதாக சொல்லப்படுகிறது.





 

இது தொடர்பாக  தீயணைப்பு துறைக்கு தகவல் தெரிவிக்கப்பட்டு மேற்படி வணிகத்தில் இருந்த சுமார் 1000க்கும் மேற்பட்ட நபர்களை தீயணைப்புத்துறையின் மூலம்  வெளியேற்றம் செய்யப்பட்டு மீட்பு பணி நடைபெற்றது. மேற்படி நிகழ்வு தொடர்பாக உயிர் சேதம் ஏதும் இல்லாத நிலையில், உடனடியாக உள்ளே இருந்த ஆயிரத்துக்கும் மேற்பட்ட பொதுமக்கள் காவல்துறையினர் மூலம் வெளியேற்றம் செய்யப்பட்டனர்.

 

மதுரையின் நகரின் முக்கிய பகுதியில் உள்ள இந்த வணிக வளாகத்திற்கு ஏற்கனவே 2011-ஆம் ஆண்டு அப்போதைய ஐ.ஏ.எஸ்., அதிகாரி சகாயம் செயல்பட அனுமதி கொடுக்காத நிலையில், அவர் மாற்றத்திற்கு பின்பாக திறக்கப்பட்ட இந்த வணிக வளாகம் தற்போது வரை செயல்பட்டு வருகிறது.



 

வணிக வளாகத்தின் அருகில் பெட்ரோல் பங்க், பள்ளிகள் மற்றும் காமராஜர் பல்கலைக்கழக கல்லூரி உள்ள நிலையில் எந்த ஒரு பாதுகாப்பும் இல்லாத இந்த வணிக வளாகத்தில் ஏற்பட்ட இந்த தீ விபத்து மதுரையில் பெரும் பரபரப்பை ஏற்படுத்தியது. நேற்று இரவு இந்த பகுதி முழுவதும் போக்குவரத்து தடை செய்யப்பட்டது. காவல்துறை துணை ஆணையர், ஆர்.டி.ஓ., , வடக்கு வட்டாட்சியர் மற்றும் மாவட்ட அதிகாரிகள் தற்போது சம்பவ இடத்தில் விசாரணை மேற்கொண்டு வருகின்றனர்.

 



 

 

இந்நிலையில் வணிக வளாகத்தில் நடைபெற்ற தீ விபத்து சம்பவம் குறித்து செய்தி சேகரிக்க சென்ற தனியார் தொலைக்காட்சி ஒளிப்பதிவாளரின் செல்போனை பறித்து அடாவடித்தனம் செய்ததோடு, குண்டர்களை ஏவி செய்தியாளர்களை அவமானப்படுத்திய வணிக வளாக ஊழியர் மற்றும் நிர்வாகிகள் மீது தல்லாகுளம் காவல் நிலையத்தில் புகார் அளிக்க உள்ளதாக செய்தியாளர் சங்க நிர்வாகி ரமேஷ் தெரிவித்தார்.