நடப்பு மக்களவை பதவிக்காலம் அடுத்தாண்டு மே மாதம் நிறைவடைய உள்ளதால், மக்களவை தேர்தல் அடுத்தாண்டு நடைபெறும் என எதிர்பார்க்கப்படுகிறது. ஆனால், அதற்கு முன்பாகவே, 5 மாநில சட்டப்பேரவை தேர்தலுடன் நாடாளுமன்ற தேர்தலை சேர்த்து நடத்த மத்திய அரசு திட்டமிட்டு வருவதாக தகவல் வெளியான வண்ணம் உள்ளது.


தேர்தலுக்கு தயாரான I.N.D.I.A கூட்டணி:


இப்படிப்பட்ட பரபரப்பான அரசியல் சூழலுக்கு மத்தியில், பாஜகவை வீழ்த்தும் நோக்கில் எதிர்க்கட்சிகள் ஒன்று சேர்ந்து மெகா கூட்டணியை அமைத்துள்ளது. எதிர்க்கட்சிகளின் முதல் கூட்டம், பிகார் மாநிலம் பாட்னாவில் நடைபெற்ற நிலையில், இரண்டாவது கூட்டம் பெங்களூருவில் நடைபெற்றது.


இந்த கூட்டத்தில்தான், எதிர்க்கட்சிகளின் மெகா கூட்டணிக்கு I.N.D.I.A என பெயர் சூட்டப்பட்டது. இதை தொடர்ந்து, I.N.D.I.A கூட்டணியின் மூன்றாவது கூட்டம் கடந்த ஆகஸ்ட் 31 மற்றும் செப்டம்பர் 1 தேதிகளில் மும்பையில் நடைபெறே்றது. இந்த கூட்டத்தில் பல முக்கிய முடிவுகள் எடுக்கப்பட்டன. மூன்று முக்கிய தீர்மானங்கள் நிறைவேற்றப்பட்டது.


வரவிருக்கும் மக்களவைத் தேர்தலில் இயன்றவரை ஒன்றாகப் போட்டியிடுவதற்கு தீர்மானம் நிறைவேற்றப்பட்டது. பல்வேறு மாநிலங்களில் தொகுதி பங்கீடு பேச்சுவார்த்தை உடனடியாகத் தொடங்கப்பட்டு, விட்டுக்கொடுக்கும் மனப்பான்மையுடன் கூடிய விரைவில் முடிக்கப்படும் என I.N.D.I.A கூட்டணி அறிவித்தது.


அதுமட்டும் இன்றி, ஒருங்கிணைப்பு, பிரச்சாரம், ஊடகம், சமூக ஊடகம் போன்றவற்றில் பல்வேறு கட்சிகளை ஒருங்கிணைக்க தனித்தனியே குழுக்கள் அமைக்கப்பட்டுள்ளன.


ஒருங்கிணைப்பு குழுவின் முதல் கூட்டம்:


இந்த நிலையில், I.N.D.I.A கூட்டணி ஒருங்கிணைப்பு குழுவின் முதல் கூட்டம் இன்று நடைபெற்றது. இதில், I.N.D.I.A கூட்டணியின் முதல் பொதுக்கூட்டம் மத்திய பிரதேசம் மாநிலம் போபாலில் அக்டோபர் முதல் வாரம் நடத்தப்படும் என அறிவிக்கப்பட்டுள்ளது. இது தொடர்பான அறிவிப்பை வெளியிட்டுள்ள காங்கிரஸ் அமைப்பு செயலாளர் கே.சி. வேணுகோபால், "ஒருங்கிணைப்புக் குழுவின் முதல் கூட்டத்தில் 12 கட்சிகளின் பிரதிநிதிகள் கலந்துகொண்டனர்.


நாட்டின் பல்வேறு பகுதிகளில் கூட்டணி சார்பில் பொதுக் கூட்டங்களை நடத்த குழு முடிவு செய்தது. அக்டோபர் முதல் வாரத்தில் போபாலில் முதல் பொதுக்கூட்டம் நடைபெறும். விலைவாசி உயர்வு, வேலையில்லா திண்டாட்டம், ஊழல் பிரச்னை உள்ளிட்டவற்றை எழுப்புவோம். சாதிவாரி மக்கள் தொகை கணக்கெடுப்பு பிரச்னையை கையில் எடுக்க கூட்டணி கட்சிகள் ஒப்புக்கொண்டன.


யாருடைய தொலைக்காட்சி விவாதங்களில் எல்லாம் கூட்டணி கட்சிகளின் பிரதிநிதிகள் கலந்து கொள்ள கூடாது என்ற முடிவை எடுக்கும் அதிகாரம் ஊடக ஒருங்கிணைப்பு குழுவுக்கு அளிக்கப்பட்டுள்ளது" என்றார்.


இந்த கூட்டத்தில், திரிணாமுல் காங்கிரஸ் பிரதிநிதி அபிஷேக் பானார்ஜி கலந்து கொள்ளாதது பல்வேறு விதமான சந்தேகங்களை எழுப்பியுள்ளது. குறிப்பாக, அவருக்கு அமலாக்கத்துறை சம்மன் அனுப்பியுள்ள நிலையில், கூட்டத்தை அபிஷேக் பானார்ஜி தவிர்த்திருப்பது முக்கியத்துவம் பெறுகிறது.


அதேபோல, சாதிவாரி கணக்கெடுப்புக்கு திரிணாமுல் காங்கிரஸ் எதிர்ப்பு தெரிவித்து வந்தது. இதன் காரணமாக, மும்பை கூட்டத்தில் சாதிவாரி கணக்கெடுப்பு விவகாரத்தில் I.N.D.I.A கூட்டணி கட்சிகள் மத்தியில் ஒருமித்த கருத்து எட்டப்படவில்லை.