பருப்புகள் மற்றும் விதைகள் ஆரோக்கியத்திற்கு மட்டுமல்ல, சுவையான சிற்றுண்டிகளாகவும் உள்ளன. குறிப்பாக இலையுதிர் காலம் மற்றும் குளிர் காலங்களில் ஆரோக்கியமான உணவாக அவை இருக்கின்றன. இவற்றில் எல்லாம் சிறந்தது என்னவென்றால், அது வால்நட் தான். அதிக அளவு புரதங்கள், பைட்டோ கெமிக்கல்கள் மற்றும் ஆக்ஸிஜனேற்றிகள் மற்றும் பிற சத்தான நார்ச்சத்துகள் இருப்பதால் இவை மிகவும் ஊட்டச் சத்து நிறைந்தவையாகின்றன. ஆனால் இந்த வால்நட் பருப்புகளுக்கு என்று மிக நீண்ட வரலாறு உண்டு என்பது உங்களுக்குத் தெரியுமா?
வால்நட்ஸ் வரலாறு
வால்நட்ஸ் என்பது மனிதனுக்குத் தெரிந்த பழமையான தாவர அடிப்படையிலான உணவுகளில் ஒன்றாகும், இது கிமு 7,000 க்கு முந்தையது. இதன் பிறப்பிடம் பெர்சியாவில் உள்ளது. பின்னர் மத்திய ஆசியா மற்றும் சீனாவிற்கு வந்தது. இந்த வால்நட் பருப்புகள் முதலில் அலெக்சாண்டரின் படைகளால் கிரேக்கத்திற்கு வர்த்தகம் செய்யப்பட்டன, பின்னர் ரோமானியர்களால் ஐரோப்பா முழுவதும் பரவியது.
புராணங்களுடன் தொடர்பு
வால்நட் புராணங்களுடன் தொடர்புடையது. கிரேக்க புராணங்களில், வால்நட் ஞானத்தின் அடையாளமாக இருந்தது மற்றும் வானத்தின் கடவுளான ஜீயஸுக்கு அர்ப்பணிக்கப்பட்டது. ரோமானிய புராணங்களில், வால்நட் வானம் மற்றும் இடியின் கடவுளான வியாழனுக்கு அர்ப்பணிக்கப்பட்டது. புராணத்தின் படி, கடவுள்கள் பூமியில் நடந்தபோது, அவர்கள் வால்நட் பருப்பில் வாழ்ந்தனர் என்ற கதையும் உண்டு. இதுவே வால்நட்டின் அறிவியல் பெயரான ஜக்லான்ஸ் ரெஜியா என்பதற்கும் அடித்தளம் என்கிறார்கள்.
இதய ஆரோக்கியம்
தி ஜர்னல் ஆஃப் நியூட்ரிஷன் அறிக்கையின்படி, வால்நட் பருப்புகளை உட்கொள்வது இருதய நோய் அபாயத்தைக் குறைக்கும், மேலும் அதன் எண்ணெய் எண்டோடெலியல் செயல்பாடுகளுக்கு மிகவும் சாதகமான பலன்களை வழங்குகிறது என்று கூறப்படுகிறது.
எடை குறைப்பு
இவற்றின் ஊட்டச்சத்தின் அடிப்படையில், அவற்றிலிருந்து உறிஞ்சப்படும் ஆற்றல் எதிர்பார்த்ததை விட 21 சதவீதம் குறைவாக இருப்பதாக ஆய்வுகள் தெரிவிக்கின்றன. அதனால் இதனை உட்கொள்வதன் மூலம் உடல் எடை குறைக்கலாம்.
மூளைக்கு நல்லது
வால்நட் பருப்புகள் பார்ப்பதற்கு மூளையைப் போலவே இருக்கின்றன என்பதால் மட்டுமில்லை, உண்மையாகவே அவை மூளைக்கும் நல்லது. ஒமேகா-3 கொழுப்பு அமிலங்கள் மூளையில் ஆக்ஸிஜனேற்ற அழுத்தத்தைக் குறைப்பதில் முக்கிய பங்கு வகிக்கின்றன. மூளை சமிக்ஞை மற்றும் நியூரோஜெனீசிஸை மேம்படுத்துகிறது.
இரத்த அழுத்தத்தை குறைக்க உதவும்
உயர் இரத்த அழுத்தம் உள்ளவர்கள், வால்நட் உட்கொண்டால் இரத்த அழுத்தத்தைக் குறைக்க உதவும் என்று சில ஆய்வுகள் தெரிவிக்கின்றன.
ஆரோக்கியமான குடல்
குடலில் அல்லது உடலில் வேறு எங்கு வீக்கம் இருந்தாலும் அதனை சரி செய்வதில் பங்களிக்கும். மேலும் சில நோய்களை எதிர்த்து போராடுவதில் இது தரும் சத்துக்கள் பங்களிக்கின்றன. இது உடல் பருமன், இதய நோய் மற்றும் புற்றுநோயின் அபாயத்தை குறைக்க வழிவகுக்கிறது. வால்நட் பருப்புகள் குடலின் ஆரோக்கியத்தை பராமரிக்கும் ஒரு வழியாக இருக்கிறது.