தெலுங்கு திரையுலகின் மெகா ஸ்டார் நடிகர் சிரஞ்சீவியின் சகோதரரும் நடிகருமான நாகேந்திர பாபுவின் மகன் வருண் தேஜ்ஜூம் தெலுங்கு திரையுலகில் பிரபலமான ஒரு நடிகராக இருந்து வருகிறார். தமிழில் சசிகுமார் ஜோடியாக 'பிரம்மன்' படத்தில் நடித்ததன் மூலம் தமிழ் ரசிகர்கள் மத்தியில் பிரபலமானவர் நடிகை லாவண்யா திரிபாதி. இவர்கள் இருவரும் காதலித்து வந்த நிலையில் இத்தாலியில் உறவினர்களும் நண்பர்களும் சூழ பிரமாண்டமாக இவர்களின் திருமணம் நேற்று நடைபெற்றுள்ளது.
நட்பு காதலானது :
‘Antariksham 9000 KMPH’ என்ற திரைப்படத்தில் ஒன்றாக இணைந்து நடித்து இருந்தனர் வருண் தேஜ் - லாவண்யா திரிபாதி. அந்தப் படத்தின்போது இவர்களுக்குள் ஏற்பட்ட நட்பு காதலாக மாறியது. இவர்கள் காதல் விவகாரம் பற்றிய கிசுகிசுக்கள் இணையத்தில் வெளியானாலும் இரு தரப்பினரும் அதிகாரபூர்வமாக அதைத் தெரிவிக்கவில்லை.
பொது வெளியில் இருவரும் அமைதி காத்து வந்த நிலையில் திடீரென கடந்த ஜூன் மாதம் இரு குடும்பத்தாரின் சம்மதத்துடன் இருவருக்கும் பிரமாண்டமாக ஹைதராபாத்தில் நிச்சயதார்த்தம் நடைபெற்றது. அதன் புகைப்படங்களும் சோசியல் மீடியாவில் வெளியாகி வைரலாகின.
வைரலாகும் புகைப்படங்கள்:
தொடர்ந்து நடிகர் வருண் தேஜ் மற்றும் நடிகை லாவண்யா திரிபாதி திருமணம் நேற்று இத்தாலியில் மிகவும் பிரமாண்டமாக நடைபெற்றுள்ளது. இந்தத் திருமண விழாவில் இரு வீட்டாரின் உறவினர்கள் மற்றும் நண்பர்கள் கலந்து கொண்டனர். சிரஞ்சீவி, பவன் கல்யாண், ராம் சரண், அல்லு அர்ஜூன், அல்லு சிரிஷ் மற்றும் தெலுங்கு திரையுலக பிரபலங்கள் பலரும் கலந்து கொண்டு மணமக்களை வாழ்த்தினர். இவர்கள் அனைவரும் மணமக்களுடன் சேர்ந்து எடுத்துக்கொண்ட புகைப்படம் லைக்ஸ்களை குவித்து வருகிறது.
வருண் தேஜ் - லாவண்யா திரிபாதி திருமண புகைப்படங்கள் சோசியல் மீடியாவில் வெளியாகி வைரலாக பகிரப்பட்டு வருகிறது. திரைப் பிரபலங்களும் ரசிகர்களும் அவர்களுக்கு வாழ்த்து தெரிவித்து வருகிறார்கள்.
தமிழ் சினிமா ரசிகர்கள் பலருக்கு வருண் தேஜ் பரிச்சயமானவராக இல்லாமல் இருக்கலாம், ஆனால் தெலுங்கு திரையுலகில் முன்னணி நடிகர்களில் ஒருவராக இருந்து வருகிறார். அதே போல லாவண்யா திரிபாதியும் பிரம்மன், மாயவன் உள்ளிட்ட தமிழ் படங்களில் நடித்தும், பல தெலுங்கு திரைப்படங்களில் நடித்ததன் மூலமும் ஏராளமான ரசிகர்களைப் பெற்றுள்ளார்.