‘வாரிசு’ படத்தின் ‘ரஞ்சிதமே ரஞ்சிதமே’ பாடல் தொடர்பான ட்ரோல்கள் தற்போது சமூக வலைதளங்களில் பரவலாக பகிரப்பட்டு வருகிறது.
வாரிசு படத்தின் ஃபர்ஸ்ட் லுக் போஸ்டர்கள் கடந்த ஜூன் 21 ஆம் தேதி விஜய்யின் பிறந்தநாளை முன்னிட்டு வெளியாகி வரவேற்பை பெற்றது. அதன்பின்னர் ஷூட்டிங் ஸ்பாட்டில் எடுக்கப்பட்ட புகைப்படங்கள், வீடியோக்கள் இணையத்தில் கசிந்ததால் படத்தின் மீது நாளுக்கு நாள் எதிர்பார்ப்பு எகிறியது. 2023 ஆம் ஆண்டு பொங்கலுக்கு இப்படம் வெளியாகும் என தெரிவிக்கப்பட்டுள்ள நிலையில் இன்னும் சில 2 மாதங்களே இருப்பதால் அடுத்தடுத்து அப்டேட்டுகள் வெளியாகி ரசிகர்களை மகிழ்விக்க போவது நிச்சயம்.
அந்த வகையில் தீபாவளிக்கு வாரிசு படத்தின் முதல் பாடல் வெளியாகும் என எதிர்பார்க்கப்பட்ட நிலையில் புது போஸ்டர் வெளியாகியிருந்தது. இதனைத் தொடர்ந்து கடந்த நவம்பர் 3 ஆம் தேதி வாரிசு படத்தின் முதல் பாடலான ரஞ்சிதமே பாடலின் ப்ரோமோ வெளியாகி ரசிகர்களிடையே நல்ல வரவேற்பை பெற்றது. தமனின் இசையில் பாடலாசிரியர் விவேக் வரிகளில் உருவாகியுள்ள இந்தப்பாடலை நடிகர் விஜய் மற்றும் பாடகி எம்.எம்.மானசி ஆகியோர் பாடியுள்ளனர். நேற்று மாலை 5.30 மணிக்கு இந்தப்பாடல் வெளியான நிலையில், பலரும் இந்தப்பாடல் ‘மொச்சக்கொட்ட பல்லழகி' பாடல் போன்று இருப்பதாக கூறி ட்ரோல் செய்து வருகின்றனர்.