சுமார் 40 ஆண்டுகளுக்குப் பிறகு நடிகை விமலா ராமன் தன் அம்மா வழி சொந்தம் எனத் தெரிய வந்ததை அடுத்து இதனை மகிழ்ச்சியுடன் வனிதா விஜயகுமார் உலகுக்கு அறிவித்துள்ளார்.
வனிதா விஜயகுமாரின் புது சொந்தம்!
கோலிவுட்டில் ‘சந்திரலேகா’ படம் மூலம் விஜய்க்கு ஜோடியாக அறிமுகமாகி ஓரிரு படங்களில் காணாமல் போன வனிதா, பின்னர் குடும்ப சச்சரவுகள் காரணமாக மீடியா வெளிச்சத்துக்கு வந்தார்.
தொடர்ந்து விஜய் டிவியின் குக்கு வித் கோமாளி, பிக்பாஸ், தன் குடும்பத்துடனான பிரிவு, சர்ச்சைக்குரிய திருமண வாழ்வு என லைம்லைட்டிலேயே இருந்து வந்த வனிதா, தற்போது மீண்டும் அந்தகன், அநீதி, அனல் காற்று, கொடூரன் என படங்களில் பிசியாக நடித்து வருகிறார்.
விமலா ராமன்
மலையாள நடிகையான விமலா ராமன், தமிழ் சினிமாவில் பாலச்சந்தரின் ‘பொய்’ படத்தின் மூலம் 2007ஆம் ஆண்டு அறிமுகமானார். தொடர்ந்து மலையாளம் ,தமிழ், தெலுங்கு என தென்னிந்திய மொழிப் படங்களில் நடித்த விமலா ராமன் குறிப்பிடத்தக்க நடிகைகளுள் ஒருவராக விளங்கினார்.
இந்நிலையில், நடிகை விமலா ராமன் தனது கஸின் சிஸ்டர் எனவும், தனது அம்மா வழி சொந்தமான விமலா ராமன் தனக்கு சொந்தமென்றும், 40 ஆண்டுகள் கழித்து தற்போது தான், தான் கண்டறிந்துள்ளதாகவும் வனிதா பதிவிட்டுள்ளார்.
மேலும் தாங்கள் இருவருமே பிரிட்டிஷ் அரசாங்கத்தால் நியமிக்கப்பட்ட சென்னை உயர் நீதிமன்றத்தின் முதல் நீதிபதியான சிடி முத்துசாமியின் பேத்தி என்றும் வனிதா பதிவிட்டுள்ளார். வனிதாவின் இந்தப் பதிவு இணையத்தில் வைரலாகி வருகிறது.