நடிகர் விஜய் நடிக்கவுள்ள 67வது படத்தின் அப்டேட் வெளியாகியுள்ள நிலையில், அப்படத்தின் இயக்குநர் லோகேஷ் கனகராஜ் வெளியிட்டுள்ள புகைப்படம் பல கேள்விகளை எழுப்பியுள்ளது.
மாஸ் காட்டிய மாஸ்டர்
கடந்த 2021 ஆம் ஆண்டு நடிகர் விஜய் நடிப்பில் மாஸ்டர் படம் வெளியானது. இப்படத்தின் மூலம் விஜய் இயக்குநர் லோகேஷ் கனகராஜூடன் கூட்டணி சேர்ந்தார். கொரோனா தொற்றால் மிகவும் பொருளாதார இழப்பை சந்தித்த திரையுலகினருக்கு இப்படம் மிகப்பெரிய நம்பிக்கையை கொடுத்தது. பெரும் வெற்றியை பெற்ற இப்படத்தில் விஜய் சேதுபதி வில்லனாக நடிக்க, மாளவிகா மோகனன் ஹீரோயினாக நடித்திருந்தார். செவன் ஸ்கிரீன் ஸ்டுடியோஸ் சார்பாக லலித் குமார் இப்படத்தை தயாரித்திருந்தார்.
இதனைத் தொடர்ந்து லோகேஷ் கனகராஜ் கமலை வைத்து ”விக்ரம்” படத்தை இயக்கியிருந்தார். இப்படத்தில் நடிகர் சூர்யா கேமியோ ரோலில் நடித்திருந்தார். இதேபோல் நடிகர் விஜய்யும் “பீஸ்ட்”, “வாரிசு” படத்தில் நடித்து முடிக்க, மீண்டும் விஜய்- லோகேஷ் கனகராஜ் கூட்டணி இணையவுள்ளதாக தகவல் வெளியானது. இதனை ஆங்காங்கே உறுதிப்படுத்தும் சம்பவங்களும் நடந்த நிலையில் இன்று அதிகாரப்பூர்வ அறிவிப்பு வெளியானது.
“தளபதி 67” அப்டேட்
அதன்படி மீண்டும் தளபதி 67 படத்தின் மூலம் விஜய்- லோகேஷ் கனகராஜ் இணைந்துள்ளனர். அனிருத் இசையமைக்கும் இப்படத்தை செவன் ஸ்கிரீன் ஸ்டுடியோஸ் சார்பாக லலித் குமார் தயாரிக்கிறார். மாஸ்டர் கூட்டணி ஒன்றிணைந்துள்ளது ரசிகர்களிடத்தில் பெரும் எதிர்பார்ப்பை ஏற்படுத்தியுள்ளது. இந்த படத்தில் ஹீரோயினாக த்ரிஷா நடிக்கவுள்ளதாக கூறப்படும் நிலையில், மன்சூர் அலிகான் அர்ஜுன், சஞ்சய் தத், கௌதம் மேனன், மிஷ்கின் உள்ளிட்ட பலரும் இணைந்துள்ளனர்.
மேலும் ஒளிப்பதிவாளராக மனோஜ் பரமஹம்சா, சண்டைப் பயிற்சியாளராக அன்பறிவ், எடிட்டிங் ஃபிலோமின் ராஜ், கலை இயக்குநராக சதீஷ் குமார், நடன இயக்குநராக தினேஷ் மாஸ்டர், வசனங்களை லோகேஷ் கனகராஜ், ரத்னகுமார், தீரஜ் வைத்தி ஆகியோர் பணியாற்றவுள்ளதாக தெரிவிக்கப்பட்டுள்ளது.
லோகேஷ் கொடுத்த ட்விஸ்ட்
இதனைத் தொடர்ந்து லோகேஷ் கனகராஜ் தனது ட்விட்டர் பக்கத்தில் விஜய்யுடன் இருக்கும் போட்டோவை பதிவிட்டார். அதில் கையில் காப்புடன் விஜய்யும், லோகேஷ் கனகராஜூம் மோதிக் கொள்வது போல காட்சி இடம் பெற்றிருந்தது. இதன்மூலம் மாஸ்டர் படத்தின் 2 ஆம் பாகம் தான் “தளபதி 67” ஆக லோகேஷ் கனகராஜ் எடுக்கவுள்ளதாக கூறப்படுகிறது. மாஸ்டர் படத்தின் கிளைமேக்ஸ் காட்சியில் இடம்பெறும் சண்டையில் விஜய்யின் கையில் இருக்கும் ரத்தக்கறையும், இந்த போட்டோவில் இருக்கும் ரத்தக்கறையும் ஒரே மாதிரியாக உள்ளது. மேலும் அதில் காப்பு வைத்து தான் விஜய் சண்டை காட்சியில் நடித்திருப்பார்.
ஏற்கனவே lokesh cinematic universe என்ற பாணியில் தன் படத்தில் இடம் பெற்ற கேரக்டர்களை அடுத்தடுத்த படத்தில் தொடர்புபடுத்தி கதை அமைத்து வருகிறார். அந்த வகையில் கண்டிப்பாக மாஸ்டர் படத்தின் தொடர்ச்சி தளபதி 67 படத்திலும் இருக்கும் என எதிர்பார்க்கப்படுகிறது.