தெலுங்கு சினிமாவில் பிரபல நடன இயக்குநராக வலம் வந்த சைதன்யா கடன் தொல்லையால் தற்கொலை செய்துக் கொண்ட சம்பவம் ரசிகர்களிடையே கடும் அதிர்ச்சியை ஏற்படுத்தியுள்ளது.
பொதுவாக சினிமாவை ஒப்பிடும்போது தொலைக்காட்சியில் ஒளிபரப்பாகும் நடன நிகழ்ச்சிகளுக்கு ரசிகர்கள் மத்தியில் தொடர்ந்து நல்ல வரவேற்பு இருக்கிறது. அந்த வகையில் பிரபல தெலுங்கு சேனலில் ஒளிபரப்பாகி வரும் 'தீ' என்கிற டான்ஸ் ஷோ மூலம் நடன இயக்குநராக பிரபலமானவர் சைதன்யா. இவர் ரியாலிட்டி நடன நிகழ்ச்சிகள் மட்டுமின்றி, சில பிரபலங்களின் படங்களின் பாடல்களுக்கும் நடன இயக்குநராக பணியாற்றியதால் திரையுலகினர் மத்தியில் மிகவும் பிரபலமாக இருந்து வந்தார்
இவரது நடனத்தை டான்ஸ் மாஸ்டரும், நடிகருமான பிரபுதேவா பாராட்டியுள்ளார். இப்படியான புகழ் ஒருபுறம் இருந்தாலும் மறுபுறம் சைதன்யா கடுமையான கடன் நெருக்கடியில் இருந்து வந்ததாக சொல்லப்படுகிறது. இதனால் ஏற்பட்ட மன உளைச்சலால் அவர் நேற்று முன்தினம் நெல்லூர் உள்ள கிளப் ஒன்றில் தூக்கிட்டு தற்கொலை செய்துக் கொண்டார்.
அவர் தற்கொலை செய்துக் கொள்ளப் போவதற்கு முன்பு வீடியோ ஒன்றை வெளியிட்டுள்ளார். அதில், "எனது அம்மா, அப்பா மற்றும் சகோதரி என்னை எந்த பிரச்சனையும் சந்திக்க விடாமல் நன்றாக கவனித்துக்கொண்டனர். எனது நண்பர்கள் அனைவருக்கும் மன்னிப்பு கேட்டுக்கொள்கிறேன். பலரைத் தொந்தரவு செய்தேன், அனைவரிடமும் மன்னிப்புக் கேட்டுக் கொள்கிறேன்.பண விஷயங்களில் எனது நல்ல குணத்தை இழந்துவிட்டேன்.கடன் வாங்குவது மட்டுமல்ல, அதைத் திருப்பிச் செலுத்தும் திறன் ஒருவருக்கு இருக்க வேண்டும்.ஆனால் என்னால் அதைச் செய்ய முடியவில்லை.தற்போது நான் நெல்லூரில் இருக்கிறேன். எனது கடைசி நாள். எனது கடன் தொடர்பான பிரச்சனைகளை என்னால் தாங்க முடியவில்லை" என தெரிவித்துள்ளார்.
சைதன்யாவின் மரணம் குறித்த செய்தி வெளியானதும் தெலுங்கு திரையுலக ரசிகர்கள் கடும் அதிர்ச்சியடைந்தனர். அவரின் கடைசி வீடியோ சமூக வலைதளங்களில் வைரலாக பரவி வரும் நிலையில் ரசிகர்கள் தங்களது இரங்கலை தெரிவித்து வருகின்றனர். மேலும் வாழ்க்கையின் பிரச்சனைகளுக்கு தற்கொலை ஒரு தீர்வாகாது என்று ரசிகர்கள் தெரிவித்து வருகின்றனர்.
வாழ்க்கையில் கவலைகளும், துன்பங்களும் வந்து கொண்டுதான் இருக்கும். அவைகளை தற்காலிகமாக்குவதும், நிரந்தரமாக்குவதும் நாம் கையாளும் விதத்தில்தான் உள்ளது. தற்கொலை என்பது எதற்கும் தீர்வு ஆகாது. வாழ்க்கைக்கான நோக்கத்தைப் பற்றிய தெளிவும் அதை அடைவதற்கான வழிகளையும் கண்டறிய துவங்கினால் வாழ்க்கை சுவாரஸ்யமானதாக இருக்கும். அப்படி தங்களுக்கு மன அழுத்தம் ஏற்பட்டாலோ தற்கொலை எண்ணம் உண்டானாலும் அதனை மாற்ற கீழ்காணும் எங்களுக்கு அழைக்கவும். மாநில உதவி மையம் :104.
சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028. தொலைபேசி எண் - (+91 44 2464 0050, +91 44 2464 0060)