கவின்
டாடா படத்தைத் தொடர்ந்து தமிழ் சினிமாவின் வளர்ந்து வரும் நடிகர் பட்டியலில் இணைந்துள்ளவர் கவின். தற்போது ‘பியார் பிரேமா காதல்’ படத்தின் இயக்குநர் இளன் இயக்கத்தில் அவர் நடித்துள்ள படம் ஸ்டார். யுவன் ஷங்கர் ராஜா இந்தப் படத்திற்கு இசையமைத்துள்ளார். நடிகனாகும் கனவை அடைய நினைக்கும் ஒரு இளைஞரின் போராட்டமே ஸ்டார் படத்தின் கதை. ஸ்டார் படத்தின் ட்ரெய்லர் சமீபத்தில் வெளியாகி எதிர்ப்பார்ப்புகளைக் கடந்த வரவேற்பைப் பெற்றுள்ளது.
பலவிதமான தோற்றங்களில் தோன்றும் கவின் அவரது டயலாக் டெலிவரி, வசனங்கள், யுவனின் மேஜிக் இசை என எல்லா விதங்களிலும் ஒரு படத்திற்கான எதிர்பார்ப்பை பலப்படுத்தும் வகையில் அமைந்திருந்தது இந்த ட்ரெய்லர். வரும் மே 10ஆம் தேதி ஸ்டார் படம் திரையரங்கில் வெளியாக இருக்கிறது. இப்படியான நிலையில், கவின் நடிக்கும் அடுத்தப் படத்திற்கான அப்டேட் நாளை வெளியாக இருப்பதாகத் தகவல் வெளியாகியுள்ளது.
நெல்சன் தயாரிப்பில் கவின்
ஜெயிலர் படத்தின் மூலம் தமிழின் முன்னணி கமர்ஷியல் இயக்குநராக மாறியுள்ள நெல்சன் திலீப் குமார் தற்போது தயாரிப்பாளராக களமிறங்க இருக்கிறார் . ஃபிலமெண்ட் பிச்சர்ஸ் என்கிற தனது சொந்த தயாரிப்பு நிறுவனத்தை தொடங்கிய நெல்சன், நேற்று இதன் அறிவிப்பை வெளியிட்டார். எல்லா தரப்பு மக்களையும் சென்று சேரும் வகையிலான சுவாரஸ்யமான கதைகளை தயாரிப்பதே இந்த தயாரிப்பு நிறுவனம் தொடங்கப் பட்டதன் நோக்கம் என நெல்சன் தெரிவித்துள்ளார். இந்த நோக்கத்துடன் எல்லா விதங்களிலும் பொருந்திப் போவது மாதிரியான ஒரு படத்தையே தனது முதல் படமாக தயாரிக்க இருப்பதாக நெல்சன் தெரிவித்தார். இந்தப் படத்தின் அறிவிப்பு வரும் மே 3ஆம் தேதி வெளியாகும் என அவர் கூறியிருந்தார்.
தற்போது நடிகர் கவின் தனது சமூக வலைதளப் பக்கத்தில் தனது அடுத்தப் படத்தின் அறிவிப்பு நாளை வெளியாகும் எனவும், இந்தப் படம் தனது மனதிற்கு மிக நெருக்கமான ஒரு படம் என்றும் பதிவிட்டுள்ளார். இத்தகவலின்படி நெல்சனின் உதவி இயக்குநரான சிவபாலன் இந்தப் படத்தை இயக்கி இருப்பதாகவும் நெல்சனின் படங்களில் இருப்பது போல் முழுக்க முழுக்க டார்க் காமெடி படமாக இந்தப் படம் உருவாகியிருப்பதாக தகவல் கூறப்படுகிறது.