நடிகர் சிவராஜ்குமார் தமிழ், கன்னடம் மற்றும் மலையாள மொழிப் படங்களில் நடித்து வருகிறார். கன்னடத்தில் ஆனந்த் என்ற படத்தின் மூலம் அறிமுகமான இவர், 100-க்கும் மேற்பட்ட படங்களில் நடித்துள்ளார். ஜெயிலர் படத்தில் இவரது ஸ்டைல் சிறப்பான வரவேற்பை பெற்றுள்ளது. இப்படத்தை பார்த்த பின் கன்னட ரசிகர்கள் மட்டுமில்லாமல் தமிழ் ரசிகர்களும் சிவராஜ்குமாரை கொண்டாடி வருகின்றனர்.
பிரபல கன்னட நடிகர் ராஜ்குமாரின் மூத்த மகன் என்ற அடையாளம் இருந்தபோதிலும் தன்னுடைய சிறப்பான திறமையால் இவர் ரசிகர்களை வெகுவாக கவர்ந்தவர். இவர் சிவாண்ணா என்று ரசிகர்களால் அன்பாக கொண்டாடப்படுபவர். கன்னடத்தில் மட்டுமில்லாமல் தற்போது தமிழ், மலையாளப் படங்களிலும் நடித்து அசத்தி வருகிறார்.
தமிழில் பேட்டிகளை கொடுத்துவரும் சிவராஜ்குமார், தான் மிகவும் எளிமையான வாழ்க்கையையே வாழ்ந்து வருவதாகவும் திடீரென சாலை ஓரமாக வாகனத்தை நிறுத்திவிட்டு சிறிய கடையில் சாப்பிடுவேன் என்றும் கூறியுள்ளார். அப்படி சாப்பிடும்போது ரசிகர்களின் தொந்தரவு இருக்கும் என்று கூறியுள்ள அவர், ஆனால் அதை மகிழ்ச்சியாக ஏற்றுக் கொள்வேன் என்றும் கூறியுள்ளார்.
ரசிகர்களின் தொந்தரவில் பெருமை, திமிர், சந்தோஷம் இவற்றைத்தான் உணர்வதாகவும் அவர் கூறியுள்ளார். தமிழில் இவரது நடிப்பில் சமீபத்தில் வெளியான ஜெயிலர் படத்தில் பாடி லேங்குவேஜில் மாஸ் காட்டி ரசிகர்களை வெகுவாக கவர்ந்துள்ளார். ஜெயிலர் படத்தில் இவரது மாஸான நடிப்பு கன்னட ரசிகர்களை மட்டுமில்லாமல் தமிழ் ரசிகர்களையும் வெகுவாக கவர்ந்துள்ளது. படத்தில் டிஷ்யூ பேப்பரை ரம்யா கிருஷ்ணனிடம் தள்ளும் ஒரு காட்சியில் அதிகமான கைத்தட்டல்களை பெற்றுள்ளார் சிவராஜ்குமார்.
தொடர்ந்து தனுஷ் -அருண் மாதேஸ்வரன் கூட்டணியில் உருவாகியுள்ள கேப்டன் மில்லர் படத்திலும் சிறப்பான கேரக்டரில் நடித்துள்ளார் சிவராஜ்குமார். இந்தப் படத்தின் டீசர் சமீபத்தில் வெளியான நிலையில், அதிலும் மிரட்டலான சிவராஜ்குமாரை பார்க்க முடிந்தது. குதிரையில் இவர் வரும் காட்சி ரசிகர்களை வெகுவாக கவர்ந்தது. மேலும் இவர் மலையாளத்திலும் பிரித்விராஜ் இயக்கத்தில் டைசன் படத்தில் நடித்து வருகிறார். சிவராஜ்குமார் நடிப்பில் கன்னடத்தில் உருவாகி உள்ள கோஸ்ட் திரைப்படம் வரும் அக்டோபர் மாதம் 19-ஆம் தேதி ரிலீசாகவுள்ளதாக அறிவிக்கப்பட்டுள்ளது. விஜய்யின் லியோ படமும் இதே நாளில் வெளியாகவுள்ளது . கோஸ்ட் படத்திற்கு அதிகமான எதிர்பார்ப்பு உள்ள நிலையில், லியோவுடன் இந்தப் படம் மோதவுள்ளது. இதனால் ரசிகர்கள் ஆர்வத்துடன் காத்திருக்கின்றனர்.
மேலும் படிக்க