தெலுங்கில் பிரபல இயக்குநராக வலம் வரும் சுகுமார் இயக்கத்தில் பல்வேறு மொழிகளில் வெளியான திரைப்படம் ‘புஷ்பா. அல்லு அர்ஜூன் மற்றும் ராஷ்மிகா மந்தனா ஜோடியாக நடித்த இந்தப் படத்தில் நடிகர் ஃபஹத் வில்லனாக நடித்தார். இந்த படத்திற்கு கலவையான விமர்சனங்கள் கிடைத்திருந்தாலும் , படத்தின் பாடல்கள் மிகப் பெரிய ஹிட் அடித்தன.
குறிப்பாக சமந்தாவின் முதல் ஐடம் சாங்கான o solriya oo oo solriya பாடல் மிகப் பெரிய வரவேற்பை பெற்றது. தியேட்டரில் இவர் ஆடிய நடன அசைவுகள் ஒட்டுமொத்த திரையரங்கையும் கட்டிப்போட்டுவிட்டது என்றே சொல்லலாம். இந்தப் பாடலின் லிரிக்கல் வீடியோ, ஸ்ட்ரீமிங் தளமான யூடியூப் பக்கத்தில் உலக அளவில் நம்பர் 1 என்ற அந்தஸ்தை பெற்றது.
பல மொழிகளிலும் இந்த லிரிக்கல் வீடியோ மில்லியன் பார்வையாளர்களை கடந்து சென்று கொண்டிருக்கிறது. லிரிக்கல் வீடியோவே மக்களிடம் மிகப் பெரிய வரவேற்பை பெற்ற நிலையில், வீடியோ பாடலும் வெளியிடப்பட்டது. அதுவும் மில்லியன் பார்வையாளர்களை கடந்து சாதனையை நோக்கி சென்றுகொண்டிருக்கிறது. இப்பாடலின் வெற்றிக்கு வரிகள் மட்டுமே காரணமல்ல. வரிகளைப் போலவே சமந்தா மற்றும் அல்லு அர்ஜுனில் நடன அசைவுகளும் அதிகம் கவனிக்க வைத்தன. பாடலுக்கு நடனம் அமைத்தவர் நடன இயக்குநர் கணேஷ் ஆச்சாரியா.
இவர் வெளியிட்ட ஒரு குறிப்பிட்ட ஸ்டெப் இணையத்தில் வைரலாகி வருகிறது. o solriya பாடலில் வாயில் சிகெரெட்டை வைத்து புகை விடுவது போன்ற ஒரு குறிப்பிட்ட நடன அசைவை கணேஷ் சொல்லிக் கொடுக்கிறார். அதனை சமந்தாவும், அல்லு அர்ஜூனும் பார்த்து சிரிக்கின்றனர். கையை தட்டிக்கொண்டு சமந்தா சிரித்தவாறே அந்த நடன அசைவை ரிகர்சல் செய்கிறார். இதனை தனது இன்ஸ்டா பக்கத்தில் பதிவிட்டுள்ள கணேஷ்,'அல்லு அர்ஜூன் - சமந்தாவுடன் அடுத்த ஹிட் என குறிப்பிட்டுள்ளார்.