ராமாயணம் , மகாபாரதம் ஆகிய இந்து புராணக் கதைகளை மையப்படுத்தி புதுப்புது படங்கள் வெளியாகியபடி இருக்கின்றன. பிரபாஸ் நடித்த ஆதிபுருஷ் , மற்றும் கல்கி இந்த புராணங்களை மையப்படுத்தி உருவானவை. தற்போது பாலிவுட்டில் தங்கல் திரைப்பட இயக்குநர் நிதேஷ் திவாரி ராமாயணத்தை திரைப்படமாக இயக்கி வருகிறார். இது தவிர்த்து பாகுபலி இயக்குநர் ராஜமெளலி மகாபாரதத்தை 10 பாகங்கள் கொண்ட படமாக எடுக்க இருப்பதாக தெரிவித்துள்ளார். இதற்கான திரைக்கதை பணிகளில் தற்போது அவர் ஈடுபட்டுள்ளார். எத்தனை படங்கள் வந்தாலும் 90 களில் வந்த ராமாயணம் மற்றும் மகாபாரத தொலைக்காட்சித் தொடர்களுக்கு ரசிகர்களிடம் எப்போதும் ஒரு பெரிய மதிப்பு இருக்கிறது.
ராமாயணா அனிமேஷன் திரைப்படம்
1990 களில் தொலைக்காட்சிகள் ஒளிபரப்பான ராமாயணா தொடர் மிக புகழ்பெற்றது. அதே போல் குழந்தைகள் மத்தியில் பிரபலமாக இருந்த அனிமேஷ் படம் Ramayana the legend of prince rama. ஜப்பானிய தயாரிப்பு நிறுவனம் தயாரித்த இந்த படம் ராமர் வனவாசம் சென்றது முதல் ராவணனிடம் இருந்து சீதை மீட்டு மீண்டும் நாடு திரும்பும் கதையை சுவாரஸ்யமான அனிமேஷன் படமாக சொன்னது. ஆனால் ஜப்பான் தயாரிப்பு நிறுவனம் தயாரித்த இப்படத்தில் இந்து கடவுள்கள் சித்தரிக்கப்பட்ட விதம் கடும் விமர்சனத்திற்கு உள்ளானது. இதனால் இந்தப் படத்தை இந்தியாவில் திரையிட தடை விதிக்கப்பட்டது. தற்போது கிட்டதட்ட 31 ஆண்டுகள் கழித்து இந்த படத்தின் மீதான தடை நீக்கப்பட்டு தற்போது மீண்டும் திரையரங்குகளில் வெளியாக இருக்கிறது.
31 ஆண்டுகளுக்குப் பின் வெளியாகும் ராமாயணா அனிமேஷன் படம்
இப்படத்தை தயாரித்த கீக் பிக்ச்சர்ஸ் இந்த தகவலை சமூக வலைதளத்தில் பதிவிட்டுள்ளார்கள். அதன்படி வரும் அக்டோபர் 18 ஆம் தேதி இப்படம் திரையரங்குகளில் வெளியாக இருக்கிறது. தமிழ், இந்தி , ஆங்கிலம் , தெலுங்கு உள்ளிட்ட மொழிகளில் இப்படம் வெளியாக இருக்கிறது. 90 ஸ் கிட்ஸ்கள் மத்தியில் இப்படத்திற்கு நல்ல வரவேற்பு இருக்கும் என்று எதிர்பார்க்கப் படுகிறது