தீபாவளி நெருங்க நெருங்க... அண்ணாத்த அப்டேட் தான் வைரல். இன்று மாலை அண்ணாத்த ட்ரெய்லர் வெளியாகிறது. சில வாரங்களுக்கு முன் பஃர்ஸ்ட் சிங்கிளில் தொடங்கி, அடுத்தடுத்து பாடல்களை ரிலீஸ் செய்து தீபாவளியை நெருக்கி செய்திருக்கிறது சன் பிக்சர்ஸ்.
சிவா இயக்கத்தில், சூப்பர் ஸ்டார் ரஜினிகாந்த் நடிக்கும் அண்ணாத்த திரைப்படத்தை சன் பிக்சர்ஸ் நிறுவனம் தயாரித்துள்ளது. தீபாவளி வெளியீடாக திரைக்கு வரும் அண்ணாத்த, ரஜினியின் சினிமா பயணத்தில் முற்றிலும் மாறுபட்ட படமாக இருக்கும் என கூறப்படுகிறது.
கடந்த 1 மாதமாக அடுத்தடுத்த அப்டேட்டுகளால் அலற விடும் அண்ணாத்த படத்தை ஒருவர் ஓர் ஆண்டுக்கு முன் அலற விட்டது எத்தனை பேருக்கு தெரியும். அண்ணாத்த படத்தில் ரஜினியின் துவக்கப்பாடலாக கூறப்படும் அண்ணாத்த அண்ணாத்தா... பாடல் கடந்த அக்டோபர் 4ம் தேதி வெளியானதாக நாம் நினைத்துக் கொண்டிருக்கிறோம். ஆனால் உண்மையில் அது பொய். 2020ல் அண்ணாத்த படத்தின் முதல் பாடல் வெளியானதும், அன்றைய தினம் ரஜினியின் தர்பார் படம் வெளியானதும் எத்தனை பேருக்கு தெரியும்.
தர்பார் வெளியான முதல் நாளில் ரசிகர்களின் ரியாக்ஷன் பார்ப்பதற்காக பல யூடியூப் சேனல்கள் மைக்கோடு தியேட்டர் வாசலில் நின்று கொண்டிருக்க, ஆதன் தொலைக்காட்சி என்கிற யூடியூப் சேனலுக்கு மட்டும் அந்த அதிர்ஷ்டம் கிடைத்தது. கருப்பு ஆடையோடு வந்த ஒரு ரசிகர், மகிழ்ச்சி வெள்ளத்தில் பேசத் தொடங்கினார். ‛நான் இங்கு தினமும் வருகிறேன்.... என்னை இங்கு யாருக்கும் தெரியவில்லை... நான் இப்போ தான் தலைவர் கூட ஆடிட்டு வர்றேன்... சிவா சார் படத்துல தலைவர் கூட அண்ணாத்த அண்ணாத்த... அதிரடி சரவெடி... என்கிற பாடலுக்கு தலைவர் கூட ஆடிட்டு வந்திருக்கேன்... என்னை இங்கே யாருக்கும் தெரியல...’ என அவர் ஒரு பாடலை பாடி, ஆடியும் காட்டினார்.
ஆனால் அப்போது அந்த உலகம், அவரை கேலியும் கிண்டலுமாக தான் பார்த்தது. பொதுவாக ஓப்பனிங் ஷோ அன்று ரசிகர்கள் இப்படி தான் உற்சாக மிகுதியில் இருப்பார்கள். இதுவும் அப்படியான ஒன்று தான் என்று அனைவரும் கடந்து சென்றார். ‛நம்புங்கய்யா... நானும் ரவுடி தான்... நானும் ரவுடி தான்...’ என அந்த மனுஷன் கெஞ்சாத குறையா கெஞ்சியும் யாரும் நம்பவில்லை.
ஆனால் அண்ணாத்த முதல் சிங்கிள் வந்த பிறகு தான் இந்த உலகம், அந்த உத்தமரை உணர்ந்தது. 2021 அக்டோபர் 4 ம் தேதி வெளியான பாடலை, 2020 ஜனவரி 9 ம் தேதியே ரிலீஸ் செய்து பெருமைக்கு சொந்தகாரர், இந்த பெயர் தெரியாத பெஸ்ட் மேன் தான். அசால்ட்டாக சூப்பர் ஸ்டாரின் பாடலை ரிலீஸ் செய்த அந்த நடனக்கலைஞரின் காட்சிகள், அந்த லிரிக் வீடியோவில் இடம் பெற்றிருப்பது தான் இன்னும் சிறப்பு.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்