இயக்குநர் அஸ்வின் சரவணன் இயக்கத்தில் நயன்தாரா நடித்துள்ள 'கனெக்ட்’ படத்தின் டீசர் இன்று மாலை வெளியாக உள்ளது.
விக்னேஷ் சிவனுடனான திருமணத்துக்குப் பிறகு நயன்தாரா வரிசைகட்டி தமிழ், தெலுங்கு, இந்தி, மலையாளம் என அனைத்து மொழிகளிலும் நடித்து வருகிறார். அந்த வகையில் 2015-ஆம் ஆண்டு தன் நடிப்பில் வெளியான சூப்பர்ஹிட் ஹாரரான ’மாயா’ படத்தின் இயக்குநர் அஸ்வின் சரவணன் உடன் மீண்டும் கைக்கோர்த்துள்ளார் நயன்தாரா.
மாயா வரிசையில் கனெக்ட் படமும் ஹாரர் படமாகவே உருவாகியுள்ளது. முன்னதாக நயன்தாரா நடித்த O2 படம் நேரடியாக ஓடிடி தளத்தில் வெளியான நிலையில், திரையரங்குகளில் ’கனெக்ட்’ வெளியாக உள்ளதால் ரசிகர்களின் எதிர்பார்ப்பு எகிறியுள்ளது.
விக்னேஷ் சிவனின் ரவுடி பிக்சர்ஸ் நிறுவனம் தயாரித்துள்ள இப்படத்தில் நடிகர் சத்யராஜ் முக்கியக் கதாபாத்திரத்தில் நடித்துள்ளார். நீண்ட இடைவெளிக்குப் பிறகு இப்படத்தின் மூலம் தமிழ் சினிமாவில் அனுபம் கெர் ரீ எண்ட்ரி கொடுத்துள்ளார்.
இத்திரைப்படத்துக்கு பிருத்வி சந்திரசேகர் இசையமைத்துள்ளார். ஒளிப்பதிவாளராக மணிகண்டன் கிருஷ்ணமாச்சாரியும் ரிச்சர்ட் கெவின் எடிட்டராகவும் பணியாற்றியுள்ளனர்.
இந்நிலையில், நயன்தாராவின் பிறந்த நாளை முன்னிட்டு இன்று மாலை கனெக்ட் படத்தின் டீசர் வெளியாகும் என அறிவிக்கப்பட்டுள்ளது. ’இது அலறுவதற்கான நேரம் எல்லாரும் தயாராகுங்கள்’ எனக் குறிப்பிடப்பட்டு முன்னதாக டீசர் குறித்த அறிவிப்பு வெளியாகியுள்ளது.
கடந்த செப்டெம்பர் மாதமே கனெக்ட் படம் பார்த்து ரசித்த இயக்குநர் விக்னேஷ் சிவன், ”இப்படி ஒரு அசாதாரணமான ஹாரர் படத்தை இயக்கிய அஸ்வின் சரவணனுக்கும், மொத்த குழுவினருக்கும் நன்றி” என தனது இன்ஸ்டாகிராம் பக்கத்தில் பகிர்ந்தது குறிப்பிடத்தக்கது.