ராயன்


துள்ளுவதோ இளமை படத்தில் நாயகனாக அறிமுகமான தனுஷின் 50 ஆவது படமாக உருவாகியுள்ள படம்தான்  ராயன். இப்படத்தை தனுஷே இயக்கி நாயகனாக நடித்துள்ளார். சந்தீப் கிஷன் , காலிதாஸ் ஜெயராமன் , துஷாரா விஜயன்  , எஸ்.ஜே.சூர்யா , செல்வராகவன் , பிரகாஷ் ராஜ் , அபர்ணா பாலமுரளி , வரலட்சுமி சரத்குமார் என ஏராளமான பிரபலங்கள் இப்படத்தில் நடித்துள்ளார்கள். இசைப்புயல் ஏ.ஆர் ரஹ்மான் இப்படத்திற்கு இசையமைத்துள்ளார். ஓம் பிரகாஷ் ஒளிப்பதிவும் , ஜாக்கி கலை வடிவமைப்பும்  செய்துள்ளார்கள். இப்படம் நேற்று ஜூலை 26 ஆம் தேதி திரையரங்கில் வெளியாகியது. ராயன் படம் ரசிகர்களிடம் பாசிட்டிவான விமர்சனங்களைப் பெற்று வசூலை குவித்து வருகிறது


முதல் நாளில் ராயன் படம் இந்தியளவில் 12 கோடி வசூலித்துள்ளதாக சாக்னிக் தளம் தகவல் வெளியிட்டுள்ளது. தமிழ்நாட்டில் 11 கோடியும் தெலுங்கு மொழியில் 1.5 கோடியும் படம் வசூல் செய்துள்ளது. தனுஷின் படங்களில் முதல் நாளில் அதிக வசூல் ஈட்டிய படங்களில் முதலிடத்தை ராயன் பிடித்துள்ளது. 


தனுஷ் இயக்கும் அடுத்த படம்


தனுஷ் இயக்கிய பவர் பாண்டி , தற்போது ராயன் ஆகிய இரு படங்களும் வெற்றிப்படங்களாக அமைந்துள்ளன. தொடர்ந்து தனுஷ் தனது மூன்றாவது படமான நிலவுக்கு என்மேல் என்னடி கோபம் படத்தை இயக்கி வருகிறார். இந்த படத்தினை இவரது வொண்டர்பார் தயாரிப்பு நிறுவனமே தயாரிக்கின்றது. இந்த படத்திற்கு ஜீ.வி. பிரகாஷ் இசையமைக்கின்றார். இந்த படத்தில் பவிஷ், அனிகா சுரேந்திரன், மேத்யூ தாமஸ், பிரியா வாரியர் உள்ளிட்ட இளம் நட்சத்திரங்கள் நடிக்கவுள்ளனர். இந்த படம் ஒரு சராசரி காதல் கதை என தனுஷ் தனது ட்விட்டர் பதிவில் குறிப்பிட்டுள்ளார். இப்படத்தின் இசை குறித்து இசையமைப்பாளர் ஜிவி பிரகாஷ் சமீபத்தில் நிகழ்ச்சி ஒன்றில் பேசியுள்ளார்


இதில் புது ஜிவியை பார்ப்பீர்கள்


இந்த நிகழ்ச்சியில் பேசிய ஜி.வி பிரகாஷ் ‘ தனுஷூம் நானும் சேர்ந்து இசையமைக்கும் போது ஒரு தனி மேஜிக் உருவாகும். ஒரு பாடலை உருவாக்கும் போது தனுஷ் அந்த பாடலுக்கான ஒரு ஐடியாவை வைத்திருப்பார். பின் நாங்கள் இருவரும் அதை பேசி பேசி பாடலை உருவாக்குவோம். ராஜா ராணி படத்தில் நீங்கள் ஒரு ஜிவி பிரகாஷை பார்த்திருப்பீர்கள். மயக்கம் என்ன படத்தில் ஒரு ஜிவி. அதுமாதிரி இந்தப் படத்தில் நீங்கள் இளமையான ஒரு ஜிவி பிரகாஷை பார்ப்பீர்கள். இந்தப் படத்தின் பாடல்கள் நான் இதுவரை செய்திராத புதிய முயற்சிகளை செய்திருக்கிறேன்’ என்று அவர் தெரிவித்துள்ளார். நடிகராக தனுஷ் படங்களை ரசிகர்கள் எதிர்பார்த்து வந்த காலம் போய் தற்போது இயக்குநர் தனுஷின் படங்களையும் ரசிகர்கள் ஆவலாக எதிர்பார்த்து காத்திருக்கிறார்கள்.