பன்முக திறமையால் அசத்தி வரும் திரைத்துறை கலைஞர்தான் தனுஷ். கோலிவுட் , பாலிவுட், டோலிவுட் , ஹாலிவுட் என அடுத்தடுத்து தனது முத்திரையை பதித்து வருகிறார். நடிப்பு அசுரன் என கொண்டாடப்படும் தனுஷ் நடிப்பில் விரைவில் வெளியாகவுள்ள திரைப்படம் மாறன். தனுஷின் 43 வது திரைப்படமாக உருவாகி வரும் இந்த திரைப்படத்தை இளம் இயக்குநர் கார்த்திக் நரேன் இயக்கியுள்ளார். சத்தியஜோதி ஃபிலிம்ஸ் படத்தை தயாரித்துள்ளது. படம் சமீப காலமாகவே ஓடிடி தளத்தில் வெளியாகும் என செய்திகள் வெளியாகி வரும் சூழலில் தற்போது அந்த தகவல் கிட்டத்தட்ட உறுதியாகியுள்ளது. முன்னதாக மாறன் திரைப்படத்தை படக்குழுவினர் ஓடிடிக்கு விற்றதாகவும் , கொரோனா ஊரடங்கு முடிந்து மீண்டும் திரையரங்குகள் திறக்கப்பட்டதால் படத்தை திரையரங்கில் வெளியிடுவதற்கான வாய்ப்பு இருப்பதாகவும் கூறப்பட்டது. ஆனால் தற்போது ஒமைக்ரான் அச்சுறுத்தல் காரணமாக பல திரைப்படங்களின் வெளியீட்டு தேதி மாற்றப்பட்டுள்ளாதால், மாறன் திட்டமிட்டபடி ஒடிடியில் வெளியாகும் என சில நம்பத்தகுந்த வட்டார தகவல்கள் தெரிவிக்கின்றன.
மாறன் திரைப்படம் வருகிற பொங்கல் பண்டிகையை முன்னிட்டு , டிஸ்னி பிளஸ் ஹாட்ஸ்டார் ஒடிடி தளத்தில் வெளியாகும் என கூறப்படுகிறது. மாறன் திரைப்படத்திற்கு யுவன் சங்கர் ராஜா இசையமைத்து வருகிறார். படத்தில் தனுஷுக்கு ஜோடியாக ‘மாளவிகா மோகன்’ நடித்துள்ளார். படத்தின் பெரும்பாலான காட்சிகள் சென்னை, ஐதராபாத் உள்ளிட்ட இடங்களை சுற்றியுள்ள முக்கியமான பகுதிகளில் எடுக்கப்பட்டுள்ளது. படத்தில் தனுஷ் மாளவிகாவுடன் சேர்த்து ஸ்மிருதி வெங்கட், சமுத்திரக்கனி, மகேந்திரன், கிருஷ்ணகுமார் போன்ற முன்னணி நடிகர்கள் முக்கிய கதாபாத்திரத்தில் நடித்துள்ளனர்.தனுஷ் நடிப்பில் சமீபத்தில் வெளியான பாலிவுட் திரைப்படமான அட்ரங்கி ரே என்னும் கலாட்டா கல்யாணம் திரைப்படம் ஒடிடியில் வெளியாகி கலவையான விமர்சனங்களை பெற்றது. இதனை தொடர்ந்து தனுஷின் அண்ணன் செல்வராகவன் இயக்கத்தில் நானே வருவேன், திருச்சிற்றம்பலம் , ஆயிரத்தில் ஒருவன் 2 , நேரடி தெலுங்கு படமான வாத்தி (தமிழிலும் பை-லிங்குவலாக உருவாக உள்ளது), அருண் - மாதேஷ்வரன் நடிப்பில் ஒரு படம் என படு பிஸியாக தனது வருடாந்திர கால்ஷூட்டை நிறைத்து வைத்திருக்கிறார் தனுஷ்.