தலைவர் 171


மாநகரம், கைதி, மாஸ்டர், விக்ரம், லியோ படங்களைத் தொடர்ந்து லோகேஷ் கனகராஜ் இயக்க இருக்கும் படம் தலைவர் 171. ரஜினிகாந்த இந்தப் படத்தில் நடிக்க, சன் பிக்ச்சர்ஸ் இந்தப் படத்தை தயாரிக்க இருக்கிறது. அனிருத் இந்தப் படத்திற்கு இசையமைக்க இருக்கிறார். லோகேஷ் கனகராஜ் இயக்கியிருக்கும் லியோ படம் இன்னும் சில நாட்களில் வெளியாக இருக்கும் நிலையில், லோக்கியின் அடுத்த படமான தலைவர் 171 குறித்த எதிர்பார்ப்பு எழுந்துள்ளது. இது தொடர்பான குட்டி குட்டித் தகவல்களை கொடுத்து வருகிறார் லோகேஷ்.


ஐமேக்ஸ் கேமராவில் படப்பிடிப்பு


தனது ஒவ்வொரு படத்துக்கும் ஏதாவது புதிதாக முயற்சிகளை செய்யும் லோகேஷ் கனகராஜ், தலைவர் 171 படத்தின் சில பகுதிகளை ஐமேக்ஸ் கேமராவில் படம்பிடிக்க இருப்பதாக சமீபத்தில் நேர்காணல் ஒன்றில் தெரிவித்தார். இந்தப் படத்தின் கதையை மாநகரம் படத்தின் ரிலீஸூக்காக காத்திருந்த காலத்தில் தான் எழுதியதாகவும், அப்போது தன்னுடைய நண்பர் இந்தப் படத்தில் நடிக்க இருந்ததாகவும் லோகேஷ் தெரிவித்துள்ளார். மேலும், ரஜினிகாந்த் நடித்த படங்களில் தனக்கு தளபதி படம் மிகவும் பிடித்த படம் என்றும், தளபதி படத்தை தான் எண்ணற்ற முறை பார்த்திருப்பதாகவும் லோகேஷ் தெரிவித்துள்ளார்.


கதை கேட்டு ரஜினியின் ரியாக்‌ஷன்


தலைவர் 171 படம் குறித்து இன்னும் விரிவாகப் பேசிய லோகேஷ் கனகராஜ் இப்படி கூறியுள்ளார் “ எல்.சி.யூவை விட்டு வெளியே வந்து என்னுடைய ஸ்டைலில் ஒரு படம் இயக்க வேண்டும் என்கிற ஆசை எனக்கு இருந்தது. தலைவர் 171இன் கதை மிகக் கச்சிதமாக ரஜினிகாந்துக்கு பொருந்தி இருக்கிறது.


இந்தப் படத்தை இயக்க நான் மிகவும் ஆர்வமாக இருக்கிறேன். அதே நேரத்தில் சூப்பர்ஸ்டார் ரஜினிகாந்தும் இந்தப் படத்தில் நடிப்பதற்கு மிக உற்சாகமாக காத்திருக்கிறார். நான் அவரிடம் கதை சொல்லி முடித்ததும் அவர் எழுந்து வந்து என்னை கட்டிபிடித்துக் கொண்டார். வழக்கம் போல் அவரது ஸ்டைலில் ‘கலக்கிட்ட கண்ணா’ என்று பாராட்டினார். அவரது கண்களில் இருந்த சந்தோஷத்தை என்னால் பார்க்க முடிந்தது” என்று லோகேஷ் கனகராஜ் கூறியுள்ளார்.


இன்னும் பல சர்ப்ரைஸ்!


இந்தப் படத்தின் வேலைகள் தொடங்கியதும் படத்தில் நடிக்கவிருக்கும் நடிகர்கள் குறித்த தகவல்கள் வெளியாகும் என லோகேஷ் தெரிவித்துள்ளார். மேலும் இந்தப் படத்தின் நடிகர்கள் பற்றி நிறைய சர்ப்ரைஸ் இருக்கிறது என்றும் தெரிவித்துள்ளார். தலைவர் 171 படத்துக்காக முதன்முறையாக மலையாளத் திரையுலகின் திரைக்கதை எழுத்தாளர்களுடன் சேர்ந்து பணியாற்ற இருப்பதாக அவர் கூறி இருக்கிறார்.


அடுத்த ஆண்டு மார்ச் இறுதி அல்லது ஏப்ரல் மாதத்தின் தொடக்கத்தில் தலைவர் 171 படத்தின் படப்பிடிப்பு தொடங்கும் என எதிர்பார்க்கலாம்.


லியோ


விஜய் , த்ரிஷா, பிரியா ஆனந்த், கெளதம் மேனன், மிஸ்கின், அர்ஜூன், சஞ்சய் தத், மன்சூர் அலிகான், சாண்டி மாஸ்டர் உள்ளிட்டோர் நடித்து உருவாகி இருக்கும் லியோ திரைப்படம், வருகின்ற அக்டோபர் 19ஆம் தேதி வெளியாக இருக்கிறது. 7 ஸ்கிரீன் ஸ்டுடியோஸ் தயாரித்துள்ள இந்தப் படத்திற்கு அனிருத் இசையமைத்துள்ளார்.