கூலி
லோகேஷ் கனகராஜ் இயக்கத்தில் ரஜினிகாந்த் தற்போது கூலி படத்தில் நடித்து வருகிறார். சன் பிக்சர்ஸ் தயாரிக்கும் இப்படத்திற்கு அனிருத் இசையமைக்கிறார். கடந்த சில நாட்களாக இப்படத்தில் நடிக்கும் நடிகர்கள் மற்றும் படத்தில் அவர்களது கதாபாத்திரங்களின் பெயர்கள் வெளியிடப்பட்டு வருகின்ற. அந்த வகையில் செளபின் சாஹிர் , நாகர்ஜூனா , ஸ்ருதி ஹாசன் , உபேந்திரா , சத்யராஜ் உள்ளிட்டவர்கள் இப்படத்தில் நடிக்கிறார்கள்.
தற்போது கூலி படத்தில் ரஜினியின் கேரக்டர் பெயரை படக்குழு வெளியிட்டுள்ளது. இப்படத்தில் ரஜினியின் கதாபாத்திரத்தின் பெயர் தேவா. மணிரத்னம் இயக்கிய தளபதி படத்தில் ரஜினி சூர்யாவாக நடித்திருந்த நிலையில் மம்மூட்டி தேவா என்கிற கதாபாத்திரத்தில் நடித்திருந்தார்.
தற்போது இப்படத்தில் அவருக்கு தேவா என்று பெயர் வைக்கப்பட்டுள்ளது தளபதிக்கு கூலி படத்திற்கு ஏதாவது சம்பந்தம் இருக்குமோ என்கிற கேள்வியை எழுப்பியுள்ளது.
கூலி பற்றி லோகேஷ் கனகராஜ்
கூலி லோகேஷ் கனகராஜ் இயக்கும் ஆறாவது படம். கடந்த ஆண்டு விஜயின் லியோ படத்தின் மீது கலவையான விமர்சனங்கள் வந்த காரணத்தினால் கூலி படத்திற்கு நிறைய மீம்கள் பகிரப்படுகின்றன. ஆனால் தீவிர லோகேஷ் ரசிகர்கள் கடந்த முறை விட்டதை இந்த முறை லோகேஷ் பிடிப்பார் என்று எதிர்பார்த்து காத்திருக்கிறார்கள். லியோ குறித்த விமர்சனங்களின் போது லோகேஷ் நேர்மையாக நிறைய விமர்சனங்களை ஏற்றுக்கொள்வதாக சொன்னதும் குறிப்பிடத் தக்கது. இதில் அதிக மகிழ்ச்சி ரஜினி ரசிகர்களுக்கு தான். கடந்த ஆண்டு நெல்சன் ஜெயிலர் என்று ஒரு சம்பவத்தைக் கொடுத்தார். அடுத்தபடியாக ஜெய் பீம் இயக்குநர் ஞானவேல் இயக்கத்தில் உருவாகும் வேட்டையன் நிச்சயம் ஒரு புதிய முயற்சியாக இருக்கும் என்று எதிர்பார்க்கலாம். தற்போது லோகேஷ் கனகராஜ் இன்னொரு பக்கம் முரட்டு நடிகர்களின் பட்டாளத்தையே திரட்டி இருக்கிறார்.
பொதுவாக தளபதி படத்திற்கு பின் சூர்யா தேவா என்கிற பெயர் ஒட்டுமொத்த தமிழ் ரசிகர்களையும் அக்கிரமித்தது. ஒரு வேளை தேவா இடத்தில் ரஜினி இருந்திருந்தால் என்ன பண்ணியிருப்பாரோ அந்த மாதிரியா ஒரு ஸ்பின் ஆஃபா இருக்குமோ?