இந்தியன் 2 படம் பார்த்துவிட்டு மன அழுத்தம் ஏற்பட்டவர்களுக்கு 20% சலுகையில் மசாஜ் செய்யப்படும் என்ற வினோத அறிவிப்பை வெளியிட்ட அழகு நிலையம்.
இயக்குநர் ஷங்கர் இயக்கத்தில் கமல்ஹாசன் நடிப்பில் உருவான இந்தியன் 2 படம் கடந்த 12-ஆம் தேதி திரையரங்குகளில் வெளியாகியது. லைகா நிறுவனம் தயாரித்துள்ள இப்படத்தில் சித்தார்த், விவேக், பிரியா பவானி ஷங்கர், காஜல் அகர்வால், ரகுல் பிரீத் சிங் போன்ற முன்னணி நடிகர்கள் நடிக்கின்றனர். தமிழ், தெலுங்கு, இந்தி உள்ளிட்ட மொழியில் உலகம் முழுவதும் நேற்று முன்தினம் வெளியானது.
1996-ஆம் ஆண்டு வெளியான இந்தியன் திரைப்படத்தின் இரண்டாம் பாகமாக வெளியான இந்தியன் 2 திரைப்படம் ரசிகர்களிடம் கலவையான விமர்சனத்தை பெற்று வருகிறது. இந்த நிலையில் கரூர் மாநகராட்சிக்கு உட்பட்ட தாந்தோணிமலையில் அமைந்துள்ள "STUDIE'O 7 Family Salon and Bridal Studio" என்ற தனியார் அழகு நிலையம், இந்தியன் 2 படத்திற்கு சென்று Stress increase செய்து கொண்ட அனைவருக்கும், Head Massage 20% சலுகை விலையில் செய்யப்படும் என்று அறிவிப்பு வெளியிட்டுள்ளது.
மேலும், இந்தியன் - 2 படத்திற்கு சென்றதற்கான டிக்கெட் நகல் அவசியம் என்ற வினோதமான விளம்பரம் ஒன்றை சமூக வலைத்தளங்களில் வெளியிட்டுள்ளனர். இந்த பதிவு வைரலாகி வரும் நிலையில், கமல் ரசிகர்கள் மற்றும் மக்கள் நீதி மையம் கட்சியினரிடம் கொந்தளிப்பை ஏற்படுத்தி உள்ளது.
இது குறித்து ஸ்டுடியோ தொடர்பு எண்ணை தொடர்பு கொண்டு கேட்டபோது இந்த தகவல் ரோட்டரி கிளப் வாட்ஸப் குழுவில் மட்டுமே பதிவு செய்யப்பட்டதாகவும் குறிப்பிட்ட நபர்களுக்கு மட்டுமே இந்த ஆஃபர் உள்ளதாகவும் தெரிவித்தனர்.