சிறுத்தை சிவா இயக்கத்தில் சூர்யா நடிப்பில் உருவாகிவரும் கங்குவா திரைப்படம், முழுக்க முழுக்க சரித்திர கதையாக இருக்கும் என்று எதிர்பார்க்கப்பட்டு வந்த நிலையில், தற்போது படத்தின் கதையில் ஒரு பெரிய ட்விஸ்ட் இருப்பது தெரியவந்திருக்கிறது.
கங்குவா
சிறுத்தை சிவா இயக்கத்தில் உருவாகி வரும் கங்குவா படத்தில் சூர்யா நடித்து வருகிறார். அவரது 42-வது படமான கங்குவா இதுவரை இல்லாத அளவுக்கு பிரமாண்ட பொருட்செலவில் எடுக்கப்பட்டு வருகிறது.
இந்தப் படத்துக்கு தேவி ஸ்ரீ பிரசாத் இசை அமைக்க, திஷா பதானி, யோகி பாபு, கோவை சரளா உள்ளிட்ட பலர் நடித்துள்ளனர். ஸ்டுடியோ கிரீன் நிறுவனம் சார்பில் ஞானவேல் ராஜா தயாரிக்கும் கங்குவா, 10 மொழிகளில் உருவாகி வருகிறது. இதில் பல கெட் அப்களில் சூர்யா நடிப்பதாகவும் கூறப்படுகிறது. இந்தப் படம் அடுத்த ஆண்டு ஏப்ரல் மாதம் திரைக்கு வரும் என எதிர்பார்க்கப்படுகிறது.
கங்குவா க்ளிம்ப்ஸ்
படப்பிடிப்புகள் விறுவிறுப்பாக நடந்து வரும் நிலையில், சூர்யாவின் பிறந்த நாளை ஒட்டி கங்குவா படத்தின் கிளிம்ப்ஸ் வீடியோவை படக்குழு வெளியிட்டது. சரியாக 12.01-க்கு வீடியோ வெளியிட்ட படக்குழு சூர்யாவுக்கு பிறந்த நாள் வாழ்த்து தெரிவித்துக்கொண்டது. தமிழ், தெலுங்கு, மலையாளம், கன்னடம், ஆங்கிலம் மற்றும் இந்தி மொழிகளில் வெளியான கங்குவா படத்தின் க்ளிம்ப்ஸ் ரசிகர்களிடையே கோலாகலமாக வரவேற்கப்பட்டிருக்கிறது.
சரித்திர கதையா கங்குவா?
கங்குவா திரைப்படம் முழுக்க முழுக்க சரித்திர கதையாக உருவாக இருக்கிறது என்று ரசிகர்கள் அனைவரும் எதிர்பார்த்து வந்த நிலையில் தற்போது மிகப்பெரிய ட்விஸ்ட் ஒன்று படத்தைப் பற்றி தெரிய வந்திருக்கிறது.
கங்குவா படத்தின் ஒரு பாதி மட்டுமே சரித்திர கதை என்றும் ஒரு பகுதி முழுவதும் சமகாலத்தில் நிகழும் கதை என்றும் தெரிய வந்திருக்கிறது. இந்த காட்சிகள் முழுவது கோவாவில் நடைபெறுவதாகவும் இந்தக் காட்சிகளில் சூர்யா தனது வழக்கமான கெட் அப்பில் தோற்றமளிப்பார் என்றும் தெரிய வந்திருக்கிறது.
ரசிகர்கள் ஏமாற்றமா கொண்டாட்டமா?
இந்த தகவல் தெரிந்த ரசிகர்கள் பெரும் அதிர்ச்சிக்கு உள்ளாகி இருக்கிறார்கள். சூர்யாவை முழுக்க முழுக்க கங்குவா லுக்கில் ஆர்வமாக காத்திருந்த ரசிகர்கள் தற்போது பாதி கதையில் மட்டும் கங்குவாவைப் பார்ப்பதை நினைத்து வருத்தமடைந்துள்ளார்கள்.
அதே நேரத்தில், படத்தில் இருக்கும் சூர்யாவின் இன்னொரு லுக்கையும் பார்க்க ஆர்வமாக இருக்கிறார்கள் ரசிகர்கள். இந்த ட்விஸ்ட்டை நிஜமாகவே யாரும் எதிர்ப்பார்க்கவில்லைதான்.