தமிழ் சினிமாவின் முன்னை ஹீரோக்களான சூப்பர் ஸ்டார் ரஜினிகாந்த், உலகநாயகன் கமல்ஹாசன் உள்ளிட்டோரை வைத்து பல சூப்பர்ஹிட் படங்களை கொடுத்த இயக்குனர் கே.எஸ். ரவிக்குமார் தற்போது தயாரிப்பாளராக புதிய பொறுப்பை ஏற்றுவருகிறார்.
மாஸ் ஹீரோக்களை இயக்கியவர்:
அசிஸ்டன்ட் டைரக்டராக இயக்குனர் விக்ரமனின் "புது வசந்தம்" திரைப்படம் மூலம் தமிழ் சினிமாவில் அடி எடுத்து வைத்தவர் கே.எஸ். ரவிக்குமார். அறிமுக இயக்குனராக 1990ம் ஆண்டு கிரைம் திரில்லர் படமான 'புரியாத புதிர்' எனும் திரைப்படத்தை இயக்கினார். அதனை தொடர்ந்து முன்னணி நடிகர்களை வைத்து முத்து, அவ்வை ஷண்முகி, தர்மம் சக்கரம், பிஸ்தா, படையப்பா, மன்மதன் அம்பு, தசாவதாரம், கொண்டாட்டம், நட்புக்காக, தெனாலி, பஞ்சதந்திரம் என பல ஹிட் படங்களை இயக்கியவர் கே.எஸ். ரவிக்குமார்.
கூகுள் குட்டப்பா :
கே.எஸ். ரவிக்குமார் இயக்குனராக மட்டும் இல்லாமல் நடிகராகவும் தனுஷுடன் இணைந்து நடித்துள்ளார். சமீபத்தில் அறிமுக இயக்குனர்களான சபரி மற்றும் சரவணன் இயக்கத்தில் வெளியான 'கூகுள் குட்டப்பா' திரைப்படத்தை தயாரித்தார் கே.எஸ். ரவிக்குமார். இப்படத்தில் பிக் பாஸ் புகழ் தர்ஷன் மற்றும் லொஸ்லியா, யோகி பாபு உள்ளிட்டவர்கள் நடித்திருந்தனர். இப்படம் மலையாள படத்தின் ரீமேக் திரைப்படம். மக்கள் மத்தியில் நல்ல வரவேற்பை பெற்றது.
இயக்குனர் விக்ரமன் மகன் அறிமுகம் :
புது முகங்களை அறிமுகப்படுத்துவதில் மும்மரம் காட்டிவரும் கே.எஸ். ரவிக்குமார் தற்போது தனது அடுத்த தயாரிப்பில் இயக்குனர் விக்ரமனின் மகன் விஜய் கனிஷ்காவை அறிமுகப்படுத்தவுள்ளார். இப்படத்தை அறிமுக இயக்குனர் சூர்யா கதிர் காக்கள்ளர் மற்றும் கே. கார்த்திகேயன் இயக்க உள்ளனர். 'ஹிட் லிஸ்ட்' என்று பெயரிடப்பட்டுள்ள இப்படத்தின் பூஜை இன்று விமர்சையாக பல திரை பிரபலங்கள் முன்னிலையில் நடைபெற்றது. இப்படத்தில் நடிகர் சரத்குமார் முக்கிய கதாத்திரத்தில் நடித்துள்ளார். படத்தின் படப்பிடிப்பு நாளை முதல் தொடங்கும் என அறிவித்துள்ளனர் படக்குழுவினர்.