ஃபேமிலி சார்ந்த சென்டிமென்ட் படங்கள் தமிழ் சினிமா ரசிகர்கள் மத்தியில் சோடை போனதாக வரலாறே கிடையாது. அதில் கொஞ்சம் காமெடி, கலாட்டா, காதல் கலந்து அனைவரும் ரசிக்கும் படியான ஒரு படத்தை கொடுத்தவர் தான் அறிமுக இயக்குநர் விநாயக் சந்திரசேகரன். அவரின் இயக்கத்தில் வெளியான 'குட் நைட்' படம் விமர்சன ரீதியாகவும் வசூல் ரீதியாகவும் நல்ல வரவேற்பை பெற்றது. சில தினங்களுக்கு முன்னர் தான் 'குட் நைட்' படத்தின் இயக்குநருக்கு மிகவும் எளிமையாக கோயிலில் திருமணம் நடைபெற்றது. சமீபத்தில் நேர்காணல் ஒன்றில் கலந்து கொண்ட விநாயக் சந்திரசேகரன் தன்னுடைய திரைப்பயணம் பற்றியும் காதல் கைகூடியது பற்றியும் பேசி இருந்தார்.
கல்லூரியில் ஏற்பட்ட நட்பு காதலாக மாறி இருவரும் வெவ்வேறு துறையை தேர்ந்து எடுத்து பயணித்துள்ளனர். சினிமாவையே கனவாக கொண்டிருந்த விநாயக் சந்திரசேகரனின் கனவுக்கு உயிர் கொடுத்தவர் அவரது காதலியான பிரியா சங்கரிதான். தன்னுடைய பாக்கெட் மணியை எல்லாம் சேர்த்து வைத்து விநாயக் ஷார்ட் பிலிம் எடுக்க உதவி செய்து இருக்கிறார். உதவி இயக்குனராக இருக்கும் சமயத்தில் அவரின் பண தேவைகளை பூர்த்தி செய்து சினிமா கனவை நோக்கிய வேகமாக ஓட வைத்தவர் பிரியாதான்.
குட் நைட் படம் வெளியானதற்கு பிறகு அதன் இயக்குநர் யார் என்பதை சொல்லாமலேயே தன்னுடைய பெற்றோரை அழைத்து சென்று அவர்கள் வாயாலேயே பாராட்டுகளை கேட்டு அதன் பின்னர் தான் விநாயக் தான் படத்தின் இயக்குநர் என்பதை சொல்லி திருமணத்துக்கு கிரீன் சிக்னல் வாங்கியுள்ளார் பிரியா. அதே போல விநாயக் வீட்டிலும் சம்மதம் வாங்கிய பிறகு அவர்களின் 9 ஆண்டுகால காதல் திருமணத்தில் முடிந்தது.
'குட் நைட்' படம் தான் விநாயக் வாழ்க்கையில் 'குட் லைஃப்' ஆரம்பமாக உறுதுணையாய் இருந்துள்ளது. திரையரங்குகளில் பாராட்டை குவித்த குட் நைட் படம் இப்போது ஓடிடியிலும் வெளியாகி பாராட்டுகளை பெற்று வருகிறது. அதற்கு முக்கியமான காரணம் அப்படம் பலரது வாழ்க்கையுடன் பர்சனலாக எளிதில் கனெக்ட்டாவது தான். ரமேஷ் திலக், ரெபேக்கா, மணிகண்டன் இப்படி அனைவருமே அந்த கதாபாத்திரங்களாகவே மக்கள் மத்தியில் அடையாளப்படுத்தப்படுவது படத்திற்கு கிடைத்த மிகப்பெரிய வெற்றி.
மிகவும் எளிமையான முறையில் விநாயக் சந்திரசேகரன் - பிரியா சங்கரி திருமணம் கோயிலில் நடைபெற்றது. அதை தொடர்ந்து மிகவும் பிரமாண்டமாக வரவேற்பு நிகழ்ச்சி நடைபெற்றது. குட் நைட் படக்குழுவினர் அனைவரும் ஆஜராக நடிகர் சிவகார்த்திகேயன், இயக்குநர் பிரதீப் ரங்கநாதன், இசையமைப்பாளர் ஷான் ரோல்டன் என பிரபலங்களும் கலந்து கொண்டு மணமக்களை மனதார வாழ்த்தினார்கள்.