விக்ரம்..


கமல்ஹாசன் நடிப்பில் வரும் நாளை வெளியாக இருக்கும் திரைப்படம் ‘விக்ரம்’. இயக்குநர் லோகேஷ் கனகராஜ் இயக்கத்தில், அனிருத் இசையில் உருவாகியிருக்கும் இந்தப்படத்தின் டீஸர், மேக்கிங் வீடியோக்கள் சமூக வலைதளங்களில் வெளியாகி ரசிகர்கள் மத்தியில் நல்ல வரவேற்பை பெற்றது. கடந்த 15ஆம் தேதி படத்தின் ஆடியோ நிகழ்ச்சி பிரம்மாண்டமாக நடைபெற்றது. இதில் டிரெய்லரும் ரிலீஸ் செய்யப்பட்டது. இந்த டிரெய்லர் ரசிகர்களை வெகுவாக கவர்ந்து ட்ரெண்டிங்கிலும் முதலிடம் பிடித்தது. டிரெய்லர் வெளியானபோதே, படத்தில் சூர்யா நடித்துள்ளதாக ரசிகர்கள் கணித்தனர்.வேறு வழியின்றி முடிச்சை அவிழ்த்த இயக்குநர் சூர்யாவும் நடித்துள்ளார் என தெரிவித்தார். 


இதனால் படத்தின் மீதான எதிர்பார்ப்பு எக்கச்சக்கமாக எகிறியது. எதிர்பார்ப்புக்கு ஏற்ப படக்குழு விளம்பரத்தில் பட்டையைக் கிளப்பியது. உள்ளூர் ரயில் முதல் துபாய் புர்ஜ் கட்டியம் வரை எங்கு பார்த்தாலும் விக்ரம் எதிரொலித்தது. இந்நிலையில் படம் நிச்சயம் ஹிட் அடிக்கும் என ரசிகர்கள் கருத்து தெரிவித்துள்ளனர். அதுபோக கமல்ஹாசனின் V செண்டிமெண்ட்படி விக்ரம் நிச்சயம் வெற்றிதான் என திரைத்துறையினர் குறிப்பிட்டுள்ளனர்




V சென்டிமெண்ட்


திரைத்துறையில் சிலர் செண்டிமெண்டாக சில விஷயங்களை பாலோ செய்வார்கள். குறிப்பிட்ட எழுத்திலேயே படத்தலைப்பை வைப்பது,  குறிப்பிட்ட கிழமையில் டீசர், ட்ரைலர் வெளியிடுவது என அவரவர்களுக்கு ஏற்றதுபோல செண்டிமெண்டும் மாறுபடும். சில நடிகர்கள் அப்படி ஏதும் பின்பற்றவில்லை என்றாலும் ரசிகர்களாகவே சில சென்டிமெண்டை உருவாக்கி விடுவார்கள்.அப்படி கமலுக்கு உருவான செண்டிமெண்ட் தான் V சென்டிமெண்ட்.



அதாவது V எழுத்தில் தொடங்கும் கமலின் திரைப்படங்கள் எல்லாமே இதுவரை படு ஜோராக பட்டையைக் கிளப்பிய படங்கள் தானாம்.


V வரிசையில் கமல்ஹாசனுக்கு வெளியான ஹிட் படங்கள்:


வறுமையின் நிறம் சிவப்பு, வாழ்வே மாயம், விக்ரம், வெற்றிவிழா, விருமாண்டி, வசூல்ராஜா, வேட்டையாடு விளையாடு,  விஸ்வரூபம் என இந்தப்பட்டியல் இருக்கிறது. இந்த வரிசையில் தற்போது விக்ரம் இணைகிறது. இதனால் நிச்சயம் விக்ரம் படமும் வெற்றிப்படமாக அமையும் என சினிமா ரசிகர்கள் மைபோட்டு பார்த்துள்ளனர்.




கமல் கொடுக்கவுள்ள இன்ப அதிர்ச்சி..


பிரம்மாண்ட நடிகர்களின் திரைப்படங்கள் வெளியானால் முதல் நாள் அதிகாலை 4 மணிக்கு சிறப்பு காட்சிகள் திரையரங்குகளில் திரையிடப்படுவது வழக்கம். அதேபோல, தமிழ்நாடு முழுவதும் நாளை மறுநாள் விக்ரம் படத்தின் சிறப்புக்காட்சி திரையிடப்பட உள்ளது. இந்த நிலையில், விக்ரம் படத்தின் முதல்நாள் முதல் காட்சியான அதிகாலை 4 மணி சிறப்புக்காட்சியை ரசிகர்களுடன் நடிகர் கமல்ஹாசன் பங்கேற்று பார்க்க உள்ளதாக தகவல்கள் வெளியாகியுள்ளது.


இந்த தகவலால் கமல்ஹாசனின் ரசிகர்கள் மிகுந்த மகிழ்ச்சியை அடைந்துள்ளனர். பொதுவாக மிகப்பெரிய நடிகர்களான ரஜினி, கமல்ஹாசஜன், அஜீத் மற்றும் விஜய் ஆகியோர் தங்களது திரைப்படங்களை ரசிகர்களுடன் இணைந்து பார்ப்பதில்லை. அவர்கள் பிரத்யேக காட்சிகளாகவோ அல்லது அவர்களது குடும்பத்தினர் ரசிகர்களுடன் இணைந்தோ மட்டும் பார்த்து வருகின்றனர். இந்த சூழலில், அரசியல் கட்சி தொடங்கிய பிறகு நடிகர் கமல்ஹாசன் நடிப்பில் வெளியாகும் விக்ரம் படத்தின் முதல்நாள் முதல் காட்சியை கமல்ஹாசன் ரசிகர்களுடன் பார்க்க இருக்கிறார் என்பது குறிப்பிடத்தக்கது.