தமிழ் திரையுலகின் சூப்பர்ஸ்டராக உலா வருபவர் ரஜினிகாந்த். இவருக்கு உலகம் முழுவதும் கோடிக்கணக்கான ரசிகர்கள் உள்ளனர். இவரது நடிப்பில் வேட்டையன் படம் அக்டோபர் 10ம் தேதி ரிலீசாகிறது. அவரது நடிப்பில் கூலி படமும் விறுவிறுப்பாக நடைபெற்று வருகிறது.
ஒரு மாதத்தில் ஜெயிலர் 2 அப்டேட்:
ரஜினிகாந்த் நடிப்பில் கடைசியாக வெளியான திரைப்படம் ஜெயிலர். கடந்த சில வருடங்களாக பெரியளவு வெற்றியைத் தராமல் இருந்த ரஜினிகாந்திற்கு ஜெயிலர் படம் மிகப்பெரிய ப்ளாக்பஸ்டர் வெற்றியாக அமைந்தது. இதையடுத்து, இந்த படத்தின் இரண்டாம் பாகம் வெளியாக உள்ளதாக தகவல் வெளியானது.
இந்த சூழலில், தனியார் நிகழ்ச்சி ஒன்றில் பங்கேற்ற ஜெயிலர் படத்தின் இயக்குனர் நெல்சன் திலீப்குமாரிடம் ஜெயிலர் 2ம் பாகம் பற்றி கேட்கப்பட்டது. அதற்கு பதில் அளித்த அவர், ஜெயிலர் இரண்டாம் பாகத்தின் அப்டேட் இன்னும் ஒரு மாதத்திற்குள் வரும். அதிகாரப்பூர்வமாக தயாரிப்பு நிறுவனம் கூறுவார்கள் என்று பதிலளித்தார். அவரது பதில் ரஜினி ரசிகர்கள் மத்தியில் மகிழ்ச்சியை ஏற்படுத்தியுள்ளது.
ஜெயிலர் படத்தை இயக்கிய நெல்சன் திலீப்குமாரே இந்த படத்தையும் இயக்க உள்ளார். முதல் பாகத்தை தயாரித்த சன் பிக்சர்ஸ் நிறுவனமே இந்த படத்தையும் தயாரிக்க உள்ளனர். ஜெயிலர் படத்தின் முதல் பாகத்தின் கிளைமேக்சில் அடுத்த பாகத்திற்கான தொடக்கத்துடன் முடிக்கப்பட்டிருக்கும்.
ரஜினி ரசிகர்கள் உற்சாகம்:
படத்திற்கு கிடைத்த மிகப்பெரிய வரவேற்பைத் தொடர்ந்து ஜெயிலர் 2ம் பாகம் உருவாகுகிறது. அந்த படத்தில் நடித்த கதாபாத்திரங்கள் இதே படத்திலும் தொடர்வார்கள் என்று எதிர்பார்க்கப்படுகிறது. ஜெயிலர் படத்தை போலவே ஜெயிலர் 2ம் பாகமும் பான் இந்தியா அளவில் வெளியிட படக்குழு திட்டமிட்டுள்ளது.
ரஜினிகாந்த் தற்போது லோகேஷ் கனகராஜ் படத்தின் கூலி படப்பிடிப்பில் பங்கேற்று வருகிறார். அந்த படத்தில் ரஜினிகாந்துடன் சத்யராஜ், மலையாள நடிகர் சோபின், கன்னட நடிகர் உபேந்திரா உள்ளிட்ட பல பிரபலங்கள் நடிக்கின்றனர். ஞானவேல் இயக்கியுள்ள வேட்டையன் படத்தில் ரஜினிகாந்துடன் பாலிவுட் சூப்பர் ஸ்டார் அமிதாப்பச்சன், ஃபகத் பாசில் உள்ளிட்ட பலரும் நடித்துள்ளனர். வேட்டையன், கூலி, ஜெயிலர் 2 என அடுத்தடுத்து ரஜினிகாந்த் படங்கள் வர இருப்பது ரஜினி ரசிகர்கள் மத்தியில் பெரும் மகிழ்ச்சியை ஏற்படுத்தியுள்ளது.