நடிகர் ஷாருக்கான் நடித்த ஜவான் படத்தில், அப்படத்தின் இயக்குநர் அட்லீ ஒரு காட்சியில் வந்து ரசிகர்களுக்கு சர்ப்ரைஸ் கொடுத்துள்ளார்.
தமிழில் ராஜா ராணி, தெறி, மெர்சல், பிகில் படங்களை இயக்கி முன்னணி இயக்குநராக உயர்ந்தவர் அட்லீ. இதில் நடிகர் விஜய்யை வைத்து தொடர்ந்து 3 படங்கள் இயக்கி அனைத்தையும் பிளாக்பஸ்டர் ஹிட் கொடுத்தார். அதன் எதிரொலியாக இந்தி சினிமாவுக்குள் இயக்குநராக அடியெடுத்து வைத்துள்ளார். அவரின் முதல் படமாக ‘பாலிவுட் பாட்ஷா’ என கொண்டாடப்படும் நடிகர் ஷாரூக்கானை வைத்து ’ஜவான்’ படம் உருவாகியுள்ளது. இந்த படத்தை ரெட் சில்லி நிறுவனம் மூலம் ஷாருக்கானே சொந்தமாக தயாரித்துள்ளார். அனிருத் இசையமைத்துள்ள இந்த படம் இன்று தியேட்டர்களில் வெளியாகியுள்ளது.
இந்தி, தமிழ், தெலுங்கு ஆகிய மொழிகளில் வெளியாகியுள்ள ஜவான் படம் கலவையான விமர்சனங்களைப் பெற்றுள்ளது. முன்னதாக படத்தின் ட்ரெய்லர், பாடல்கள் ஒரு பக்கம் வரவேற்பை பெற்ற நிலையில், மறுபக்கம் ஜவான் படம் பல படங்களின் சாயல் இருப்பதாக ரசிகர்கள் தெரிவித்தனர். இதனிடையே பெரும் எதிர்பார்ப்புகளுக்கிடையே இன்று படம் வெளியானது. தமிழில் முதல் காட்சி காலை 9 மணிக்கு தொடங்கிய நிலையில் படம் பார்க்க சென்ற ரசிகர்கள் உள்ளே ஒரு சினிமாவே இருக்கிறது என இடைவேளையிலேயே சமூகவலைத்தளத்தில் பதிவுகளை வெளியிட தொடங்கினர்.
இப்படியான நிலையில் ஜவான் படத்தில் இயக்குநர் அட்லீ ஒரு காட்சியில் வந்து ரசிகர்களுக்கு சர்ப்ரைஸ் கொடுத்துள்ளார். முன்னதாக இயக்குநர் ஷங்கரிடம் உதவி இயக்குநராக இருந்த அட்லீ, ‘நண்பன்’ படத்தில் இடம்பெற்ற ‘அஸ்கு லஸ்கா’ பாடலில் தோன்றியிருப்பார். தொடர்ந்து விஜய் நடித்து தான் இயக்கிய பிகில் படத்தில் ‘சிங்கப்பெண்ணே’ பாடலில் இசையமைப்பாளர் ஏ.ஆர்.ரஹ்மான் மற்றும் விஜய்யுடன் இணைந்து தோன்றினார். இப்படியான நிலையில் ஜவான் படத்தில் ’வந்த இடம்’ என்னும் அறிமுக பாடல் ஒன்று உள்ளது. இதில் தோன்றும் அட்லி அசத்தலாக நடனம் ஆடியுள்ளார். இதனைப் பார்த்த ரசிகர்கள் பேசாமல் நீங்க ஒரு டான்ஸரா மாறிடலாம் என கமெண்ட் செய்து வருகின்றனர்.
மேலும் படிக்க: Jawan Review : கலெக்ஷனா? காப்பியா?.. அட்லீ செய்தது என்ன?.. ஜவான் படம் முழு விமர்சனம் இதோ..!