ராகவா லாரன்ஸ், கங்கனா ரனாவத், வடிவேலு உள்ளிட்டோர் நடிப்பில் உருவாகியுள்ள சந்திரமுகி 2 படத்தின் அப்டேட் நாளை அதாவது ஜூன் மாதம் 29ஆம் தேதி மாலை 5 மணிக்கு வெளியிடப்படும் என படக்குழு அறிவித்துள்ளது.
கடந்த 2005 ஆம் ஆண்டு ஏப்ரல் 14 ஆம் தேதி ரஜினிகாந்த், ஜோதிகா, பிரபு, நயன்தாரா, வடிவேலு, நாசர், வினித், மாளவிகா என ஏகப்பட்ட நட்சத்திரங்கள் நடிப்பில் வெளியான படம் “சந்திரமுகி”. பி.வாசு இயக்கிய இப்படத்திற்கு வித்யாசாகர் இசையமைத்திருந்தார். பிளாக் பஸ்டர் ஹிட் அடித்த சந்திரமுகி தென்னிந்திய சினிமாவில் 800 நாட்களுக்கும் மேல் திரையரங்குகளில் ஓடி மிகப்பெரும் சாதனை படைத்தது. இதனிடையே இப்படத்தின் 2 ஆம் பாகம் குறித்த முயற்சிகளை பி.வாசு கடந்த சில ஆண்டுகளாகவே எடுத்து வந்தார்.
அதன் அடுத்தக் கட்டமாக கடந்தாண்டு சந்திரமுகி-2 படம் உருவாக உள்ளதாக அதிகாரப்பூர்வ அறிவிப்பு வெளியானது. பி.வாசு இயக்கும் இப்படத்தில் ஹீரோவாக ராகவா லாரன்ஸ் நடிக்கவுள்ளதாக தெரிவிக்கப்பட்டது. இதனால் 2 ஆம் பாகம் முதல் பாகத்தை போல இருக்குமா என்ற கேள்வி ரசிகர்களிடத்தில் எழுந்தது.
தொடர்ந்து சந்திரமுகியாக ஜோதிகாவுக்கு நிகராக யார் நடிப்பார் என்ற எதிர்பார்ப்பு எழுந்த நிலையில், அந்த கேரக்டரில் கங்கனா ரணாவத் நடிக்கிறார் என சந்திரமுகி 2 படத்தை தயாரிக்கும் லைகா நிறுவனம் தெரிவித்திருந்தது. மேலும் ராதிகா, வடிவேலு, லட்சுமி மேனன், ஸ்ருஷ்டி டாங்கே, சுரேஷ் மேனன், மஹிமா நம்பியார் உள்ளிட்ட பலரும் இந்த படத்தில் இணைந்துள்ளனர்.
நாட்டு நாட்டு பாடலுக்கு ஆஸ்கர் விருது பெற்ற இசையமைப்பாளர் மரகதமணி சந்திரமுகி-2 படத்திற்கு ஒப்பந்தம் செய்யப்பட்டுள்ளதால் பெரும் எதிர்பார்ப்பு நிலவுகிறது. அதற்கேற்றாற்போல் படப்பிடிப்பும் விறுவிறுப்பாக நடைபெற்று சமீபத்தில் முடிவுக்கு வந்தது என படக்குழு அறிவித்தது.