தமிழ் சினிமாவின் முன்னணி இயக்குனர் ஷங்கர் புது முக இளைஞர்களை வைத்து இயக்கிய 'பாய்ஸ்' திரைப்படம் 2003ம் ஆண்டு வெளியானது. ஏ.எம். ரத்னம் தயாரித்த இப்படத்தில் சித்தார்த், நகுல், தமன், ஜெனிலியா, மணிகண்டன், விவேக் உள்ளிட்ட பலர் நடித்திருந்தனர். எ.ஆர். ரஹ்மானின் இசை படத்தின் வெற்றிக்கு பக்கபலமாக அமைந்தது.
இளம் காதல் ஜோடிகள் காதலுக்காக வீட்டை விட்டு வெளியேறுகிறார்கள். உடன் நண்பர்களும் வீட்டை விட்டு வெளியேறுகிறார்கள். மிகவும் சிரமப்பட்டு தங்களின் திறமைகளை வைத்து வாழ்க்கையில் எப்படி ஜெயிக்கிறார்கள் என்பதை மிகவும் என்டர்டெயின்மென்ட்டாக இளம் தலைமுறையினருக்கு ஏற்ற வகையில் வெளியான இப்படம் மாபெரும் வெற்றியை பெற்றது.
இளைஞர்களின் சேட்டையை பிரதிபலித்த படம் :
இளைஞர்கள் என்பதால் சேட்டையும் கொஞ்சம் அதிகமாகவே இருந்தது நிஜத்தை பிரதிபலித்தது. இளம் பருவத்தில் அவர்கள் செய்யும் லூட்டிகள் அனைத்தையும் அப்படியே திரையில் காட்சிப்படுத்தி இருந்தார் இயக்குனர் ஷங்கர். அப்படி ஒரு சேட்டை தான் நண்பர்கள் அனைவரும் சேர்ந்து பாலியல் தொழில் செய்யும் ஒரு பெண்ணை ஹீரோ சித்தார்த் வீட்டிற்கு அழைத்து வருவது போன்ற ஒரு காட்சி இடம் பெற்று இருக்கும். மிகவும் பிரபலமான அந்த காட்சியில் பாலியல் தொழில் செய்பவராக நடித்திருந்தார் நடிகை புவனேஸ்வரி. சமீபத்தில் நடைபெற்ற ஒரு நேர்காணலில் அவர் ஏன் பாய்ஸ் படத்தில் பாலியல் தொழில் செய்பவராக நடித்திருந்தார் என்பது குறித்து மனம் திறந்து பேசியிருந்தார்.
மனம் திறந்த புவனேஸ்வரி :
"சின்னத்திரையில் சீரியல்களில் நடித்து வந்த எனக்கு ஷங்கர் சார் பாய்ஸ் படத்தில் நடிக்க அழைப்பு விடுத்தார். அது தான் என்னுடைய முதல் படம். சில சீன்கள் மட்டுமே நடித்திருந்தாலும் மிக அதிகமாக பேசப்பட்டு பெரிய அளவில் பிரபலமானேன். ஷங்கர் சார் இந்த படத்தின் கதை பற்றி என்னிடம் கூறுகையில் முதல் படத்திலேயே இப்படி நடிக்க வேண்டுமா? என கேட்டேன். இது ஐந்து இளைஞர்கள் பற்றின கதை. கல்லூரி இளைஞர்கள் நிஜ வாழ்க்கையில் எப்படி இருப்பார்கள் என்பது தான் படத்தின் திரைக்கதை.
அவர்கள் ஐந்து பெரும் உங்களுடன் நடித்தாலும் ஒருவரின் விரல் கூட உங்கள் மேல் படாது. அதனால் நீங்கள் சங்கடப்படாமல் மிகவும் தைரியமாக நடிக்கலாம் என்றார். ஷங்கர் சாரை நேரில் பார்க்கும் போதே மிகவும் பிரமிப்பாக பிரமாண்டமாக இருந்தது. அந்த சமயத்தில் நான் ஓரிரு சீரியல்களில் மட்டுமே நடித்து இருந்தேன். அதிலேயே எனக்கு சினிமா வாய்ப்பு அதுவும் ஷங்கர் சார் படம் என்றதும் ரொம்ப சந்தோஷமாக இருந்தது. அவருக்காக தான் நான் இப்படத்தில் நடிக்க சம்மதித்தேன். அப்படத்தில் அந்த கதாபாத்திரத்தில் நடித்ததற்காக நான் என்றுமே வருத்தப்பட்டதில்லை. தெலுங்கில் வெளியான பாய்ஸ் திரைப்படமும் நல்ல வரவேற்பை பெற்றது என பேசியிருந்தார்.