அவதார் படத்தின் 2 ஆம் பாகமான தி வே ஆஃப் வாட்டர் படமானது இந்தியாவில் ரூ.200 கோடி வசூலை தாண்டியுள்ளதால் ஹாலிவுட் ரசிகர்கள் மகிழ்ச்சியடைந்துள்ளனர்.
ஹாலிவுட்டின் பிரமாண்ட இயக்குநர் ஜேம்ஸ் கேமரூனின் இயக்கத்தில் கடந்த 2009 ஆம் ஆண்டு டிசம்பர் 18 ஆம் தேதி வெளியான திரைப்படம் ‘அவதார்’. கிராபிக்ஸ் காட்சிகள் என கண்டுபிடிக்க முடியாத அளவுக்கு தொழில் நுட்பத்தில் மிரட்டிய அவதார் படம் உலகளவில் அதிகமான வசூல் சாதனை செய்த படம் என்ற சாதனையை இன்றளவும் தக்கவைத்துள்ளது. இதனிடையே அவதார் படத்தின் 2 பாகமான தி வே ஆஃப் வாட்டர் கடந்த டிசம்பர் 16 ஆம் தேதி உலகம் முழுவதும் வெளியானது.
முதல் பாகத்தின் தொடர்ச்சியாக பண்டோரா உலகின் மக்களுக்கு தன்னால் ஆபத்து நேருகிறது என்பதை அறியும் ஹீரோ ஜேக் சல்லி, குடும்பத்தினரோடு கடல்வாசிகள் வாழும் பண்டோரா உலகத்தில் தஞ்சமடைகிறார். அவரை வில்லனான கர்னல் எப்படி பழிவாங்க முற்படுகிறார் என்பதே 2 ஆம் பாகத்தின் கதையாக அமைக்கப்பட்டுள்ளது.
இந்தியாவில் ஆங்கிலம், தமிழ், தெலுங்கு, மலையாளம், கன்னடம், இந்தி ஆகிய மொழிகளில் வெளியாகியுள்ள இப்படம் வசூலை தொடக்க நாள் முதலே வாரிக் குவித்து வருகிறது. விஷூவல் காட்சிகள் ரசிகர்களுக்கு மிகப்பெரிய ட்ரீட்டாக அமைந்துள்ள நிலையில், முதல் 3 நாட்களில் 3 நாட்களில் உலகளவில் ரூ.3600 கோடி வசூலை குவித்தது. அதன்பிறகு வழக்கமான வேலை நாட்கள் தொடங்கிய நிலையில் வசூலில் சிறிதும் குறைவில்லாத வகையில் ரசிகர்கள் குழந்தைகளுடன் தியேட்டருக்கு படையெடுத்து வருகின்றனர்.
இந்நிலையில் ஒரு வாரம் கடந்துள்ள நிலையில், 8 நாட்களில் இந்தியாவில் ரூ.200 கோடி வசூலை பெற்றுள்ளது. அதேபோல் உலகளவில் ரூ.5,782 கோடி வசூலித்துள்ளதாகவும் தகவல்கள் வெளியாகியுள்ளது.