Amaran Box Office Collection Day 1: சிவகார்த்திகேயன் திரைப்பயணத்தில் இதுவரை இல்லாத அளவில், அமரன் திரைப்பட முதல் வசூல் பதிவாகியுள்ளது.


அமரன் வசூல் சாதனை:


சிவகார்த்திகேயன், சாய் பல்லவி நடித்துள்ள 'அமரன்' திரைப்படம் திரையரங்குகளில் வெளியாகி மாபெரும் வரவேற்பை பெற்றுள்ளது. ராணுவ வீரரின் வாழ்க்கை வரலாறு அடிப்படையிலான இத்திரைப்படம் வெளியான முதல் நாளிலேயே தமிழகத்தில் வசூல் சாதனை படைத்துள்ளது. மேஜர் முகுந்த் வரதராஜன் வாழ்க்கையை  அடிப்படையாகக் கொண்ட இப்படம் விமர்சன ரீதியாகவும் வரவேற்பை பெற்றுள்ளது. தீபாவளியன்று இப்படம் ரூ.21 கோடி வசூல் செய்துள்ளதாகவும், சிவகார்த்திகேயன் படத்திற்கு முதல்நாளில் இவ்வளவு வசூல் கிடைப்பது இதுவே முதல்முறை எனவும் கூறப்படுகிறது.


அமரன் திரைப்பட முதல்நாள் வசூல்:


Sacnilk.com தரவுகளின் அடிப்படையில் உள்நாட்டு சந்தையில் வெள்ளிக்கிழமை, அமரன் திரைப்படம் ரூ.21.21 கோடி வசூலித்துள்ளது. தமிழ்நாட்டில் இப்படம் முதல் நாளில் ரூ.15 கோடி வசூலித்துள்ளதாக கூறப்படுகிறது. இந்தியன் 2 திரைப்படம் முதல் நாளில் 13 கோடி ரூபாயை வசூலித்துள்ள நிலையில், அந்த சாதனையை அமரன் திரைப்படம் முறியடித்துள்ளது. இருப்பினும் விஜயின் திரைப்படம் முதல் நாளில் 30 கோடி ரூபாய்க்கும் அதிகமாகவும், ரஜினியின் வேட்டையன் திரைப்படம் 22 கோடி ரூபாய்க்கும் அதிகமாகவும் முதல் நாளில் வசூல் செய்து, நடப்பாண்டின் மிகப்பெரிய படங்களாக தொடர்கின்றன.


தமிழ் மற்றும் தெலுங்கு மாநிலங்களில் தீபாவளிக்கு வெளியாகும் படங்களுக்கு, முதல் நாளில் பெரிய ஓப்பனிங் இருக்காது என கூறப்படும் நிலையில்,  அமரன் படம் பார்வையாளர்களால் ஏற்றுக்கொள்ளப்பட்டு வசூல் ரீதியாகவும் அசத்தியுள்ளது. வெளிநாட்டில் படத்தின் வசூல் தொடர்பாக் தகவல் எதுவும் தற்போது வரை வெளியாகவில்லை. இருப்பினும் தற்போதைய சூழலே தொடர்ந்தால், முதல் வார இறுதியிலேயே அமரன் திரைப்படத்தின்  மொத்த வசூல் 100 கோடி ரூபாயை கடக்கும் என எதிர்பார்க்கப்படுகிறது. 


அமரன் திரைப்படக் குழு:


ராஜ்குமார் பெரியசாமி இயக்கிய 'அமரன்' திரைப்படம், ஜம்மு காஷ்மீரில் 44-வது ராஷ்டிரிய ரைபிள்ஸ் பட்டாலியனின் ஒரு பகுதியாக நடந்த தீவிரவாத எதிர்ப்பு நடவடிக்கையின் போது உயிரிழந்த அசோக சக்கர விருது பெற்ற வீரரான மேஜர் முகுந்தின் கதையை விவரிக்கிறது.


சிவகார்த்திகேயன் முக்கிய வேடத்தில் நடிக்கிறார், மறைந்த மேஜரின் மனைவி இந்து ரெபேக்கா வர்கீஸ் வேடத்தில் சாய் பல்லவி நடிக்கிறார். படத்தின் மற்ற முக்கிய கதாபாத்திரங்களில் புவன் அரோரா, ராகுல் போஸ், ஷியாம் மோகன், ஸ்ரீகுமார் மற்றும் லல்லு ஆகியோர் நடித்துள்ளனர். கமல்ஹாசனின் ராஜ்கமல் நிறுவனம் இப்படத்தை தயாரித்துள்ளது.