தன் குழந்தை ராகாவின் முதலாம் ஆண்டு பிறந்தநாளில் நடிகை அலியா பட் பகிர்ந்துள்ள பதிவு ரசிகர்களை நெகிழ்ச்சியடையச் செய்துள்ளது.


திருமணம் டூ தாய்


பாலிவுட் சினிமாவின் முன்னணி நடிகையாக வலம் வரும் அலியா பட், நடிகர் ரன்பீர் கபூரைக் காதலித்து, கடந்த ஆண்டு திருமணம் செய்துகொண்டார். பாலிவுட்டின் பிரபல கபூர் குடும்பத்துக்கு திருமணமாகிச் சென்ற அலியா, கடந்த ஆண்டு இறுதியிலேயே தாயானார்.


பெண் குழந்தைக்கு தாயான அலியா, தொடர்ந்து சினிமாவிலும் கவனம் செலுத்து நடித்து வரும் நிலையில், 2021ஆம் ஆண்டு வெளியான ‘கங்குபாய்  கத்தியாவாடி’ படத்துக்காக சமீபத்தில் தன் முதல் தேசிய விருதினைப் பெற்றார்.


குடும்பம் , வாழ்க்கை இரண்டிலும் வெற்றிகரமாக வலம் வரும் அலியா பட், தன்  தொடக்ககால சினிமா வாழ்வில் கடுமையாக ட்ரோல்களை சம்பாதித்த நிலையில், அதற்கு நேரெதிராக தற்போது பலராலும் இன்ஸ்பிரேஷனாக பார்க்கப்பட்டு வருகிறார்.


பாலிவுட் தாண்டியும் தன் தாறுமாறு நடிப்பால் பல ரசிகர்களைப் பெற்றுள்ள அலியா பட், ஹாலிவுட்டிலும் சமீபத்தில் என்ட்ரி தந்தார்.


குழந்தை ராகாவுக்கு உருக்கமான வாழ்த்து


இந்நிலையில், அலியா பட் தன் குழந்தை ராகாவின் முதல் பிறந்தநாளுக்கு வாழ்த்தி உருக்கமான பதிவை பகிர்ந்துள்ளார்.


"எங்கள் மகிழ்ச்சி, எங்கள் வாழ்க்கை.. எங்கள் ஒளி! நீ நேற்று தான் என் வயிற்றில் உதைத்துக் கொண்டிருந்தது போல் இருக்கிறது. உனக்காக இந்த பாடலை நேற்று வாசித்தது போல் இருக்கிறது.. எங்கள் வாழ்வில் நீ வந்ததற்கு நாங்கள் பாக்கியம் செய்துள்ளோம்.


எங்கள் வாழ்வின் ஒவ்வொரு நாளையும் ஒரு ருசியான க்ரீம் கேக் துண்டு போல் உணர வைக்கிறாய். பிறந்தநாள் வாழ்த்துக்கள் குட்டிப் புலி.. உன்னை அதிகமாக நேசிக்கிறோம்” எனப் பதிவிட்டுள்ளார்.


 






நடிகர் ரன்பீர் கபூர் சமூக வலைதளங்களில் இல்லாத நிலையில், அவருக்கும் சேர்த்து அலியா நெகிழ்ச்சியுடன் பதிவிட்டுள்ளார். மேலும் குழந்தையின் கைகளை ஃபோட்டோவாக அலியா பதிவிட்டுள்ள நிலையில், இந்தப் பதிவு இணையத்தில் லைக்ஸ் அள்ளி வருகிறது.


தொடர் ஹிட் படங்கள்


முன்னதாக தன்னை அறிமுகப்படுத்திய கரண் ஜோகர் இயக்கத்தில் அலியா நடித்த ‘ராக்கி ஆர் ராணி கி ப்ரேம் கஹானி’ படம் நூறு கோடிகள் வசூலைக் கடந்து கவனமீர்த்தது. தீபிகா படுகோனின் கணவரும் நடிகருமான ரன்வீர் சிங் உடன் அலியா இரண்டாம் முறையாக ஜோடி சேர்ந்த நிலையில், அலியாவின் நடிப்பு, லுக்ஸ் என அனைத்தும் வழக்கம்போல் கவனம் ஈர்த்து அப்ளாஸ் அள்ளியது.


அலியா நடிப்பில் ஜிக்ரா எனும் திரைப்படம் விரைவில் வெளியாக உள்ளது குறிப்பிடத்தக்கது.