அஜித் - மகிழ் திருமேனி கூட்டணியில் ஏகே 62 படத்தின் படப்பிடிப்பு மார்ச் மாதம் தொடங்கும் எனத் தகவல்கள் வெளியாகியுள்ளன.
துணிவு வெற்றி
துணிவு பட வெற்றிக்குப் பிறகு லண்டன், ஸ்காட்லாந்து என நடிகர் அஜித் தன் குடும்பத்துடன் சுற்றுலா சென்றிருந்த புகைப்படங்கள் முன்னதாக இணையத்தில் வெளியாகி லைக்ஸ் அள்ளி வந்தன.
இந்நிலையில் அஜித் வகேஷன் முடித்து மீண்டும் தமிழ்நாடு திரும்பியுள்ளதாகவும் விரைவில் ஏகே 62 படத்தின் படப்பிடிப்பு தொடங்கும் என்றும் தகவல்கள் வெளிவந்துள்ளன.
அஜித் - மகிழ் திருமேனி கூட்டணி
சென்ற ஆண்டு இயக்குநர் விக்னேஷ் அஜித்தின் அடுத்த படத்தை இயக்குவார் என்ற அதிகாரப்பூர்வ அறிவிப்பு வெளியானது. ஆனால் துணிவு பட ரிலீசுக்குப் பிறகு நிலைமை தலைகீழாக மாறி கடந்த சில வாரங்களில் விக்னேஷ் சிவனுக்கு பதிலாக மகிழ் திருமேனி ஏகே 62 படத்தை இயக்குவார் என அறிவிப்புகள் வெளியாகத் தொடங்கின.
ஏகே 62 தொடர்பான அறிவிப்பு வெளியாகி 8 மாதங்களுக்கு மேல் ஆன நிலையில், விக்னேஷ் சிவன் சொன்ன கதை அஜித்துக்கு பிடிக்கவில்லை என்றும் வேறு கதை தயார் செய்யுமாறும் அஜித் வலியுறுத்தியதாகவும் முதலில் தகவல்கள் வந்தன.
விக்னேஷ் சிவன், வெங்கட் பிரபு
தொடர்ந்து அஜித் கதை பிடிக்கவில்லை என கூறிய பிறகும், அதை பொருட்படுத்தாமல் நேரடியாக லண்டனுக்கே சென்று, லைகா நிறுவன உயர்மட்ட அலுவலர்களிடம் விக்னேஷ் சிவன் கதையை கூறியதாகவும், ஆனால் அந்தக் கதை பிடிக்காமல் லைகா நிறுவனமும் விக்னேஷ் சிவனிடம் கடுமை காட்டியதாகவும் தொடர்ந்து தகவல்கள் வெளியாகின.
தொடர்ந்து இதனை உறுதி செய்யும் வகையில், விக்னேஷ் சிவன் தன் ட்விட்டர் பயோவிலிருந்து ஏகே 62 மற்றும் அஜித் புகைப்படத்தை நீக்கினார்.
இந்நிலையில், ஏகே 62 படத்தை மகிழ் திருமேனி இயக்குவார் என்றும், சந்தோஷ் நாராயணன் இந்தப் படத்துக்கு இசையமைப்பார் என்றும் தகவல்கள் வெளியாகி வந்தன.
மேலும், மற்றொருபுறம் No Guts No Glory என்ற துணிவு பட வசனம் பொறித்த டிசர்ட் அணிந்து இயக்குநர் வெங்கட் பிரபு இருக்கும் புகைப்படம் வைரலானது.
மார்ச்சில் படப்பிடிப்பு
இந்நிலையில், அஜித்தின் அடுத்த இயக்குநர் வெங்கட் பிரபு தான் என்றும், இந்தப் படம் ஏகே 62 இல்லை மங்காத்தா 2 என்றும் சமூக வலைதளங்களில் தகவல்கள் வெளியாகின.
ஆனால் இவை குறித்து எந்த அதிகாரப்பூர்வத் தகவல்களும் இதுவரை வெளியாகவில்லை. இந்நிலையில், ஏகே 62 படப்பிடிப்பு வரும் மார்ச் முதல் வாரத்தில் தொடங்கும் எனத் தகவல்கள் வெளியாகி வருகின்றன.
இந்த ஆண்டு பொங்கல் ரிலீசாக மூன்றாவது முறையாக அஜித் - போனி கபூர் - ஹெச் வினோத் கூட்டணியில் வெளியான துணிவு படம் உலகம் முழுக்க ரூ. 250 கோடி வரை வசூலித்துள்ளது குறிப்பிடத்தக்கது.