அஜித்
அஜித் ரசிகர்கள் மிக ஆவலாக எதிர்பார்த்து இருக்கும் இரு படங்கள் குட் பேட் அக்லி மற்றும் விடாமுயற்சி. விடாமுயற்சி படத்தின் படப்பிடிப்பு முடிவடைந்து ரிலீஸூக்கு தயாராகி வருகிறது. குட் பேட் அக்லி படத்தின் இரண்டாம் கட்ட படப்பிடிப்பு விரைவில் தொடங்க இருக்கிறது. விடாமுயற்சி படத்திற்காக ஒரு வருடமாக காத்திருந்த அஜித் ரசிகர்கள் தற்போது குட் பேட் அக்லி படத்திற்கே தங்கள் ஆதரவைத் தெரிவித்து வருகிறார்கள். படம் அறிவிக்கப்பட்டு இன்னும் டீசர் கூட வெளியாகாததே இதற்கு காரணம் என சொல்லலாம்.
விடாமுயற்சி
துணிவு படத்திற்கு பின் மகிழ் திருமேணி இயக்கத்தில் அஜித் நடித்த படமே விடாமுயற்சி. கடந்த ஆண்டு இப்படத்தின் அறிவிப்பு வெளியாகி துபாயில் படப்பிடிப்பு நடைபெற்றது. படத்தின் டைட்டில் அறிவிப்பு வெளியானதைத் தொடர்ந்து படம் குறித்த எந்தவிதமான தகவலும் வராததால் அஜித் ரசிகர்கள் ஏமாற்றமடைந்தார்கள். இடையிடையில் படத்தின் போஸ்டர்கள் வெளியானாலும் இந்த போஸ்டர்கள் அனைத்தும் ஒரே மாதிரியே இருந்தன. மேலும் இந்த ஆண்டு தீபாவளிக்கு படம் வெளியாகும் என தெரிவிக்கப்பட்டு இதுவரை படத்தின் டீசர் கூட வெளியாகவில்லை. தற்போது விடாமுயற்சி படமும் அடுத்த ஆண்டு பொங்கலுக்கு ஒத்திவைக்கப்பட்டிருப்பதாக தகவல்கள் வெளியானதைத் தொடர்ந்து அஜித் ரசிகர்கள் 'எங்களுக்கு படமே வேண்டாம். குட் பேட் அக்லி போதும் ' என சமூக வலைதளத்தில் பதிவிட்டு வருகிறார்கள்.
குட் பேட் அக்லி
கடந்த ஆண்டு மார்க் ஆண்டனி படத்தின் வெற்றியைத் தொடர்ந்து ஆதிக் ரவிச்சந்திரன் குட் பேட் அக்லி படத்தைத் தொடங்கினார். படம் அறிவிக்கப்பட்ட கொஞ்ச நாட்களிலேயே ஃபர்ஸ்ட் லுக் , செகண்ட் லுக் வெளியிட்டு ரசிகர்களை உற்சாகப்படுத்தினார். முதற்கட்ட படப்பிடிப்பும் முடிந்து தற்போது அடுத்த கட்ட படப்பிடிப்பிற்கு படக்குழு தயாராகி வருகிறது. அஜித் ரசிகர்களின் ஏக்கத்தை புரிந்துகொண்டு அதற்கேற்ற வகையில் அவ்வப்போது அப்டேட் கொடுத்து வருவதால் ரசிகர்களிடம் இப்படத்திற்கு வரவேறு அதிகரித்துள்ளது.
மேலும் படிக்க : Manimegalai: குக் வித் கோமாளி சர்ச்சை - ”பிரியங்காவிற்கு நிறைய ஷோ கிடைக்கணும்” - மணிமேகலை நெத்தி அடி