தியேட்டரில் படங்கள் போட்டிப்போட்டுக்கொண்டு ரிலீஸ் ஆவது ஒருபுறம் என்றால், தொலைக்காட்சிகளில் புதுப்படங்களை வெளியிட்டு நடக்கும் டிஆர்பி போட்டியும் தற்போது அதிகமாகியுள்ளது. இப்போதெல்லாம் தியேட்டரில் ரிலீஸ் ஆகி சில நாட்களிலேயே தொலைக்காட்சியில் படங்கள் வெளியாகிவிடுகின்றன. சில படங்கள் நேரடியாக தொலைக்காட்சியிலேயே ரிலீஸ் ஆகின்றன. இந்நிலையில் வரும் உழைப்பாளர் தினமான மே1ம் தேதி சன் டிவி மற்றும் ஜீ டிவியில் இரண்டு முக்கிய நடிகர்களின் படங்கள் ஒளிபரப்பாக உள்ளன.
இந்த விஷயம் தற்போதே இணையத்தில் வைரலாகத் தொடங்கியுள்ளது. காரணம், விஜய் மற்றும் அஜித். விஜய் நடித்துள்ள மாஸ்டர் திரைப்படம் சன் டிவியிலும், அஜித் நடித்து சமீபத்தில் வெளியான வலிமை திரைப்படம் ஜீ டிவியிலும் ஒளிபரப்பாகவுள்ளது. மே1ம் தேதி அஜித் பிறந்தநாள் என்பதால் வலிமை ரிலீஸாகவுள்ளதாக கூறப்படுகிறது. இதனால் இரு நடிகர்களின் ரசிகர்களும் இப்போதே சோஷியல் மீடியாக்களில் போட்டிப்போடத் தொடங்கிவிட்டனர். டிஆர்பி ரேட்டிங்கில் யார் வெற்றி பெறப்போவார்கள் என்ற போட்டியே இணையத்தை ஆக்கிரமிக்க தொடங்கியுள்ளது.
இதற்கிடையே சமீபத்தில் பீஸ்ட் படத்துக்கான ப்ரமோஷனாக விஜய் நேர்காணல் சன் டிவியின் ஒளிபரப்பானது. கிட்டத்தட்ட 10 வருடங்களுக்கு பிறகு விஜய் நேர்காணலில் பங்கேற்றார். அந்த நேர்காணலை பீஸ்ட் படத்தின் இயக்குநர் நெல்சன் திலீப் குமார் எடுத்திருந்தார். அடுத்தடுத்து ப்ரோமோக்கள், நீண்ட வருடங்களுக்கு பிறகு விஜயின் நேர்காணல் என அதிக எதிர்பார்ப்பு நிலவியது. சோஷியல் மீடியாக்களிலும் நேர்காணல் ட்ரெண்ட்டானது.
இவ்வளவு எதிர்பார்ப்பு இருந்தும் டிஆர்பியில் பின் தங்கியதாகவே தகவல் வெளியானது. அதே நேரத்தில் விஜய் டிவியில் ஒளிபரப்பான புஷ்பா திரைப்படம் விஜயின் நேர்காணலை விட அதிக பார்வையாளர்களால் பார்க்கப்பட்டதாகவும்,டிஆர்பியில் சன் டிவியை விஜய் டிவி முந்தியதாகவும் தகவல் வெளியானது. இந்நிலையில் மீண்டும் ஒரு டிஆர்பி போர் வரும் மே 1ம் தேதி நடக்கவுள்ளது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்