நடிகர் அஜித்குமார் கார் ஓட்டும் வீடியோவை, பிரபல பாடலுடன் இணைத்து அவரது மனைவி ஷாலினி வீடியோ ஒன்றை வெளியிட்டுள்ளார். ஷாலினி அஜித்குமார் எனும் தனது ரிவிட்டர் பக்கத்தில், உன்னோடு வாழாத வாழ்வு என்ன வாழ்வு என பிரபல பாடல் வரிகளை பதிவிட்டுள்ளார். அதோடு, அவர்கள் இருவரும் இணைந்து நடித்த அமர்க்களம் படத்தில் இடம்பெற்ற அந்த உன்னோடு வாழாத வாழ்வு என்ன வாழ்வு என்ற பாடலை, அஜித் கார் ஓட்டுவது போன்ற வீடியோவில் இணைத்து வெளியிட்டுள்ளார். 22 விநாடிகள் ஓடக்கூடிய அந்த வீடியோவில், மலைகளுக்கு நடுவே காரை இயக்கும் அஜித்குமார், வெள்ளை நிற சட்டையணிந்து ஸ்டைலாக காட்சியளிக்கிறார். இந்த வீடியோ தற்போது இணையத்தில் வைரலாகியுள்ளது.






வைரலாகும் புகைப்படங்கள்:


அதோடு கருப்பு நிற டிராக் மற்றும் ஜெர்ர்கின் அணிந்து அஜித் ஸ்காட்லாந்து சாலைகளில் நிற்பது மற்றும் தனது காருக்கு எரிபொருள் நிரப்புவது போன்ற புகைப்படங்களையும் பதிவிட்டு, மை கிளிக் என ஷாலினி குறிப்பிட்டுள்ளார். இந்த புகைப்படங்களையும், அஜித் ரசிகர்கள் தற்போது அதிகளவில் பகிர்ந்து வருகின்றனர்.


காதல் ஜோடி அஜித் - ஷாலினி:


அமர்க்களம் படத்தில் நடித்தபோது காதலிக்க தொடங்கிய அஜித் மற்றும் ஷாலினி பெற்றோர் சம்மதத்துடன் திருமணம் செய்து கொண்டனர். திருமணத்திற்கு பிறகு நடிப்பை நிறுத்தி விட்டு ஷாலினி குடும்பத்தை கவனித்து வருகிறார் . பிரியாத வரம் திரைப்படம் தான் அவரது நடிப்பில் வெளியான கடைசி திரைப்படம்.  திருமணம் முடிந்தவுடனே ஆண்டுக்கு ஒரு படத்தில் மட்டும் தான் நடிக்க வேண்டும் என ஷாலினி சொல்ல, அஜித்தும் அதற்கு சம்மதம் தெரிவித்து உள்ளார்.  அஜித் – ஷாலினி தம்பதியருக்கு அனுஷ்கா என்ற மகளும் ஆத்விக் என்ற மகனும் உள்ளனர். அஜித் - ஷாலினி தம்பதி சமீபத்தில் தங்களது 22 ஆவது திருமண நாளை கொண்டாடினார்கள். அதுதொடர்பான புகைப்படங்களும் சமூக வலைதளங்களில் வைரலானது. தமிழ் சினிமா காதல் ஜோடிகளில், அஜித் - ஷாலினி தம்பதிக்கு என்றுமே தனி ரசிகர் பட்டாளம் உண்டு என்பது தவிர்க்க முடியாத உண்மை.


AK 62:


அண்மையில் அஜித் நடிப்பில் வெளியான துணிவு திரைப்படம், வாரிசு உடனான போட்டிக்கு மத்தியிலும் பிரமாண்ட வெற்றி பெற்றது. வங்கிக்கொள்ளையை மையமாக கொண்டு, வங்கிகள் செய்யும் ஏமாற்று வேலைகளை அந்த திரைப்படம் தோலுரித்து காட்டியது. எச்.வினோத் மற்றும் அஜித்குமார் கூட்டணியில் உருவான மூன்றாவது திரைப்படம் இதுவாகும். மஞ்சு வாரியர் முக்கிய கதாபாத்திரத்தில் நடித்து இருந்தார். இதைதொடர்ந்து, தனது அடுத்த படத்திற்கு அஜித்குமார் தயாராகி வருகிறார்.


கழட்டி விடப்பட்ட விக்னேஷ் சிவன்:


அஜித்குமாரின் அடுத்த படத்தை விக்னேஷ் சிவன் இயக்குவார் என கடந்த ஆண்டே அறிவிக்கப்பட்டது. ஆனால், தயாரிப்பு நிறுவனமான லைகவிற்கு, விக்னேஷ் சிவனிற்கு ஏற்பட்ட கருத்து முரண்பாடு காரணமாக தற்போது அந்த படம் கைவிடப்பட்டுள்ளது. இதையடுத்து, அஜித்குமாரின் அடுத்த படத்தை, மகிழ் திருமேனி இயக்குவார் என கூறப்படுகிறது.