நடிகை சமந்தா நடித்துள்ள யசோதா படத்தின் டீசர் வெளியாகி ரசிகர்களிடம் பெரும் வரவேற்பை பெற்றுள்ளது.
ஸ்ரீதேவி மூவிஸ் சார்பில் சிவலெங்கா கிருஷ்ண பிரசாத் தயாரிப்பில் யசோதா என்ற படத்தில் சமந்தா நடித்துள்ளார். ஹரிஹரிஷ் இயக்கியுள்ள இப்படத்தில் வரலட்சுமி சரத்குமார், உன்னி முகுந்தன், ராவ் ரமேஷ், முரளி சர்மா உள்ளிட்ட பலரும் நடித்துள்ளனர். த்ரில்லர் பாணியில் உருவாகியுள்ள யசோதா படம் முதலில் ஆகஸ்ட் 12 ஆம் தேதி வெளியாகும் என அறிவிக்கப்பட்டது.
ஆனால் போஸ்ட் புரொடக்ஷன்ஸ் பணிகள் தாமதமானதால் ரிலீஸ் தேதி தள்ளிவைக்கப்பட்டுள்ளது. இந்நிலையில் விநாயகர் சதுர்த்தியை முன்னிட்டு யசோதா படத்தின் அப்டேட் வெளியானது. அதில் செப்டம்பர் 9 ஆம் தேதி மாலை 5.49 மணியளவில் யசோதா படத்தின் டீசர் வெளியாகும் என தெரிவிக்கப்பட்டது. ஆனால் நேற்று டீசர் வெளியாகும் நேரம் மாற்றியமைக்கப்பட்டு காலை 10.24 மணிக்கு வெளியாகும் என தெரிவிக்கப்பட்டது.
அதன்படி வெளியாகியுள்ள டீசர் ரசிகர்களை பெரிதும் கவர்ந்துள்ளது. கர்ப்பமாக இருக்கும் சமந்தா எதிர்கொள்ளும் சவால்களே இப்படத்தின் கதையாக உருவாகப்பட்டுள்ளது. த்ரில்லர் பாணியில் உருவாகியுள்ள டீசரை பார்க்கும் போது ஒரு எதிர்பார்ப்பை ஏற்படுத்தி விடுகிறது. மணிசர்மா இப்படத்திற்கு இசையமைத்துள்ளார்.
முன்னதாக தமிழ், தெலுங்கில் முன்னணி நடிகையாக இருக்கும் சமந்தா கடந்தாண்டு அக்டோபர் மாதம் தனது காதல் கணவரும், நடிகருமான நாக சைதன்யாவை விவாகரத்து செய்தார். திரையுலகைச் சேர்ந்தவர்களுக்கு, ரசிகர்களுக்கும் இந்த சம்பவம் கடும் அதிர்ச்சியை ஏற்படுத்தியது. இதனைத் தொடர்ந்து சமந்தா கடந்தாண்டு வெளியான புஷ்பா படத்தில் இடம் பெற்ற ஊ சொல்றியா மாமா பாடலின் மூலம் இந்திய அளவில் பிரபலமானார். இதனால் அவரின் அடுத்தடுத்த படங்கள் மீது ரசிகர்களின் கவனம் குவிந்து வருகிறது.