ஒரு தாயை ஒருபோதும் சீண்டாதீர்கள். தன் குழந்தைகளுக்காக விமர்சிப்பவர்களையும் அழிக்க தயங்க மாட்டாள் என நடிகை குஷ்பூ காட்டமாக பதிவிட்டுள்ளார்.
சமீபகாலமாக நடிகை குஷ்பூ - இயக்குநர் சுந்தர்.சி தம்பதியினரின் இரு மகள்கள் பற்றியும் அதிகளவிலான உருவகேலி, படுமோசமான விமர்சனம் சமூக வலைத்தளங்களில் முன்வைக்கப்பட்டு வருகிறது. இதுதொடர்பாக குஷ்பூ காட்டமான பதிலடி ஒன்றை கொடுத்துள்ளார்.
அவர் வெளியிட்டுள்ள பதிவில், “இது என் குடும்பம். அன்பு, நம்பிக்கை மற்றும் புரிதலின் அடிப்படையில் உருவானது. இன்று நாங்கள் இருக்கும் நிலையை அடைய, நாங்கள் பல போராட்டங்களைச் சந்தித்தோம். உடல் வருந்தக் கடினமாக உழைத்தோம். ரத்தமும் வியர்வையும் சிந்தினோம். சில சமயங்களில் நாங்கள் தடுமாறியிருக்கலாம், தோல்வியடைந்திருக்கலாம் அல்லது கீழே விழுந்திருக்கலாம். ஆனால், மீண்டும் முழு வீச்சோடு போராடி வெற்றி பெறுவதை நாங்கள் ஒருபோதும் நிறுத்தவில்லை.
எங்கள் குழந்தைகளை மிகுந்த அக்கறையுடன் வளர்த்தோம். அவர்கள் வெற்றியால் திசைதிருப்பப்படுவதையோ அல்லது பிரபலங்களின் குழந்தைகள் என்ற அந்தஸ்தை அனுகூலமாகப் பயன்படுத்திக்கொள்வதையோ நாங்கள் ஒருபோதும் அனுமதிக்கவில்லை. அவர்கள் யார் என்பதை வைத்து அவர்கள் ஒருபோதும் எந்தச் சலுகையையும் பெற முயன்றதில்லை. எங்கள் குழந்தைகளை நினைத்து நாங்கள் பெருமை கொள்கிறோம்.
ஒரு தாயாக, யாரோ ஒரு அற்ப மனிதர் என் குழந்தைகளை அவமதிக்கவோ, மரியாதையின்றி நடத்தவோ அல்லது வெறும் இரண்டு நிமிட மலிவான விளம்பரத்திற்காக அவர்களைப் பயன்படுத்திக்கொள்ளவோ நான் அனுமதிக்க மாட்டேன். அனுமதிக்கவும் மாட்டேன். அத்தகையவர்களின் மனநிலை மிகவும் மோசமானது, தரம் தாழ்ந்தது மற்றும் நாகரிகமற்றது. அது அவர்களின் வளர்ப்பையே தெளிவாகப் பிரதிபலிக்கிறது. அவர்கள் பேசும் அதே மொழியிலும் அதே பாணியிலும் பதிலடி கொடுக்க எனக்குத் தெரியும், ஆனால் நான் அதைச் செய்ய மாட்டேன். என் தாயையும் அவர் எனக்கு அளித்த வளர்ப்பையும் அவமதிக்க நான் விரும்பவில்லை.
ஆனால், நான் அமைதியாக இருக்கிறேன் என்பதற்காக, உங்கள் அருவருப்பான, கேவலமான மனநிலையை நான் ஏற்றுக்கொள்கிறேன் என்று நினைத்துவிடாதீர்கள். ஒரு தாயை ஒருபோதும் சீண்டாதீர்கள். நினைவில் கொள்ளுங்கள், ஒரு தாய் காயமடைந்த புலி போன்றவள். தன் குட்டிகளைக் காக்க அவள் பாய்ந்து தாக்கி அழித்து விடுவாள். இந்தச் செய்தி, என் குழந்தைகளையும் குடும்பத்தையும் பயன்படுத்திச் சில பின்தொடர்பவர்களையும் கேலிச் சிரிப்புகளையும் பெற நினைக்கும் அந்தத் தரம் தாழ்ந்த நபருக்கானது மட்டுமல்ல.
தங்கள் குடும்பத்தைக் காப்பாற்றப் பணம் சம்பாதிப்பதற்காக எங்களைப் பற்றி அமர்ந்து பேசும் அந்த 'யூடியூபர்கள்' (YouTubers) அனைவருக்கும் இது ஒரு தெளிவான செய்தி.இனிப் பொறுத்துக்கொள்ள முடியாது. இன்று நமக்காக நாமே குரல் கொடுக்காவிட்டால், இந்த மட்டமான மனிதர்கள் நம்மை மிதித்துச் செல்வார்கள். அவர்களுக்குத் தெரியாத ஒரு விஷயம் என்னவென்றால், எங்களுக்குள் இருக்கும் வலிமை விலைக்கு வாங்கப்பட்டதல்ல. அது கடின உழைப்பால் ஈட்டப்பட்டது.
இங்குள்ள ஒவ்வொரு பெண்ணுக்கும் நான் சொல்வது இதுதான். உங்களுக்காக நீங்கள் உறுதியாக நில்லுங்கள். மற்றவர்கள் உங்களை மதிக்கத் தவறினால், அதைப் பற்றிக் கவலைப்படாதீர்கள். உங்களை நீங்களே மதிக்கக் கற்றுக்கொள்ளுங்கள். மற்றவர்கள் உங்களை அவமதிப்பதை ஒருபோதும் அனுமதிக்காதீர்கள்” என குஷ்பூ காட்டமாக தெரிவித்துள்ளார்.